Ирэх наймдугаар сарын 5-9-ний өдрүүдэд Зүүн Азийн эрэгтэйчүүдийн волейболын аварга шалгаруулах тэмцээн Монгол Улсад зохион байгуулагдана. Тус тэмцээнийг Монголын волейболын холбоо болон Зүүн Азийн волейболын холбооны албан ёсны эрхийн хүрээнд Улаанбаатар хотноо явуулах юм.
Шилдэг шигшээ багууд Монголд өрсөлдөнө
Энэ удаагийн тэмцээнд Зүүн Азийн бүс нутгийн өндөр чансаатай үндэсний шигшээ багууд оролцож, аваргын төлөө хүч үзнэ.
БНХАУ, Япон, БНСУ зэрэг бүс нутагтаа төдийгүй дэлхийн волейболын хүчирхэг төлөөлөл болсон багуудын зэрэгцээ Монгол, Тайвань, Хонконг, Макаогийн шигшээ багууд Улаанбаатар хотод цуглан өрсөлдөх юм.
Зүүн Азийн аварга шалгаруулах тэмцээн нь бүс нутгийн хамгийн өрсөлдөөнтэй волейболын тэмцээнүүдийн нэгт тооцогддог.
Монгол Улс тав дахь удаагаа хүлээн авна
Манай улс өмнө нь 2000, 2008, 2015, 2017 онуудад Зүүн Азийн аварга шалгаруулах тэмцээнийг амжилттай зохион байгуулж байсан туршлагатай.
Энэ удаа Монгол Улс тус тэмцээнийг тав дахь удаагаа эх орондоо хүлээн авч байна.
Өмнөх жилүүдэд Монголын шигшээ багууд дараах амжилтыг үзүүлж байжээ.
- Эмэгтэй шигшээ баг 2000 онд мөнгөн медаль хүртсэн;
- Эмэгтэй шигшээ баг 2008 онд хүрэл медаль хүртсэн;
- Эрэгтэй шигшээ баг 2015, 2017 онд дараалан дөрөвдүгээр байр эзэлсэн.
Үндэсний шигшээ өргөтгөсөн бүрэлдэхүүнээр бэлтгэлээ эхлүүлжээ
Эх орондоо болох энэхүү тэмцээнд оролцох Монгол Улсын үндэсний шигшээ баг өргөтгөсөн бүрэлдэхүүнтэйгээр бэлтгэл сургуулилалтаа эхлүүлээд байна.
Энэ удаагийн бүрэлдэхүүний онцлог нь гадаадын мэргэжлийн лигүүдэд амжилттай тоглож буй Монголын шилдэг тамирчид шигшээ багтаа эргэн нэгдэж байгаа явдал юм.
Тодруулбал, Т.Хангал, Ж.Энх-Эрдэнэ, Б.Баярсайхан, М.Уранбаяр нар үндэсний шигшээ багийн бүрэлдэхүүнд эргэн ирж, эх орныхоо нэрийн өмнөөс талбайд гарахаар болжээ.
Монголын волейболын том сорилт эхэлнэ
Гадаадын мэргэжлийн лигүүдэд туршлага хуримтлуулсан шилдэг тамирчдаа нэгтгэснээр Монголын эрэгтэйчүүдийн шигшээ баг энэ удаа хүчирхэг бүрэлдэхүүнээрээ өрсөлдөх боломжтой болж байна.
Улаанбаатар хотноо болох Зүүн Азийн аварга шалгаруулах тэмцээн нь Монголын волейболын хөгжил, үндэсний шигшээ багийн олон улсын туршлага, чансааг ахиулах чухал боломж болох юм.
