Хоёр байршилд шинэ авто зам тавихаар төлөвлөжээ
Хан-Уул дүүргийн 22 дугаар хороо, Зайсан орчимд энэ онд нийт 1.9 километр авто зам шинээр барихаар төлөвлөсөн байна.
Нийслэлийн Замын хөгжлийн газрын Авто замын хяналтын мэргэжилтэн Ж.Эрдэнэ-Очир-ын мэдээлснээр, Зайсан орчимд хоёр байршилд авто зам шинээр тавих юм.
Эхний зам нь Хийморийн овооны арын замаас Ар Зайсангийн гудамж хүртэл 1.1 километр үргэлжилнэ.
Хоёр дахь зам нь Тэнгэр рашааны гудамжнаас Хүмүүн сургуулийн зүүн урд тал хүртэл үргэлжилж, улмаар Ар Зайсангийн гудамжтай холбогдох 0.8 километр урттай байх аж.
Авто замыг явган хүний зам, гэрэлтүүлэгтэй барина
Шинээр барих авто замуудыг 6 метрийн зорчих хэсэгтэй, хоёр талдаа 1.5 метрийн явган хүний замтай, мөн гэрэлтүүлэгтэйгөөр төлөвлөжээ.
Гүйцэтгэгчээр нийслэлийн Баруун бүсийн зам засвар, арчлалтын газар шалгарсан бөгөөд одоогоор бэлтгэл ажлаа хангаж байна.
Ж.Эрдэнэ-Очир:
“Гүйцэтгэгчээр нийслэлийн Баруун бүсийн зам засвар, арчлалтын газар шалгарч, бэлтгэл ажлыг хангаж байна. Энэ оны наймдугаар сард ашиглалтад оруулна” гэж мэдээлжээ.
Нийт төсөв 5.4 тэрбум төгрөг
Тэнгэр рашааны гудамжнаас Хүмүүн сургуулийн зүүн урд тал, Ар Зайсангийн гудамж хүртэлх 0.8 км авто замыг 2.7 тэрбум төгрөгөөр барихаар төсөвлөсөн байна.
Мөн Хийморийн овооны арын замаас Ар Зайсангийн гудамж хүртэлх 1.1 км авто замыг 2.7 тэрбум төгрөгөөр барина.
Ингэснээр хоёр замын нийт төсөв 5.4 тэрбум төгрөг болж байна.
Уулын замын нэвтрүүлэх хүчин чадал нэмэгдэнэ
Шинэ авто замууд ашиглалтад орсноор Хан-Уул дүүргийн 22 дугаар хорооны замын ачаалал буурна гэж тооцоолжээ.
Мөн Зайсан орчим дахь хөдөлгөөний урсгал илүү жигдэрч, Уулын замын нэвтрүүлэх хүчин чадал сайжрах төлөвтэй байна.
