Завхан аймгийн Идэр суманд бэлчээрт байсан 57 адууг хулгайлахыг завдсан байж болзошгүй гурван иргэнийг цагдаагийн байгууллага үйлдэл дээр нь илрүүлэн саатуулжээ.
Уг хэрэг аравдугаар сарын 14-ний орой 22:00 цагийн орчимд гарсан байна. Цагдаагийн байгууллагын мэдээлснээр сэжигтэй этгээдүүд халиун азаргатай 33, хүрэн азаргатай 24 буюу нийт 57 тооны адууг малын хашаанд оруулан, автомашинд ачих гэж байхад нь барьсан аж.
Одоогоор тухайн гурван иргэнийг саатуулж, хэргийн нөхцөл байдал болон оролцоог нь тогтоох мөрдөн шалгах ажиллагаа үргэлжилж байна.
Малын хулгайн эрсдэл намар, өвөл нэмэгддэгийг анхааруулав
Цагдаагийн байгууллагаас намар, өвлийн улиралд мал хулгайлах гэмт хэрэг нэмэгдэх хандлагатай байдаг тул малчид бэлчээрийн малдаа тавих хяналтаа сайжруулахыг сануулжээ.
Мөн малын хашаа, бэлчээр орчимд сэжигтэй автомашин, үл таних хүн, хэвийн бус хөдөлгөөн ажиглагдсан тохиолдолд шуурхай мэдээлэхийг зөвлөсөн байна.
Ийм нөхцөл байдал илэрвэл 102 дугаарт нэн даруй мэдээлж, малын хулгайн гэмт хэргээс урьдчилан сэргийлэхэд хамтран ажиллахыг анхааруулжээ.
Хэргийг одоогоор мөрдөн шалгаж байгаа тул саатуулагдсан иргэдийн гэм бурууг шүүх эцэслэн тогтооно.
