Хятадын усанд сэлэлтийн залуу тамирчин Юй Зиди Айчи-Нагояагийн Азийн наадамд гайхалтай амжилт үзүүлж, ердөө 13 настайдаа тэмцээний хамгийн үнэ цэнтэй эмэгтэй тамирчнаар шалгарчээ.
Гурван төрөлд наадмын дээд амжилтыг шинэчлэв
Юй Зиди энэ удаагийн Азийн наадмын усанд сэлэлтийн тэмцээнд гурван төрөлд шинэ амжилт тогтоосон байна.
Тэрбээр:
- 200 метрийн эрвээхэй сэлэлт
- 200 метрийн холимог сэлэлт
- 400 метрийн холимог сэлэлт
гэсэн гурван төрөлд Азийн наадмын дээд амжилтыг шинэчилж, богино хугацаанд олон улсын анхаарлыг татсан авьяаслаг тамирчдын нэг гэдгээ дахин харуулжээ.
Эдгээр амжилтынхаа ачаар Юй Зиди Айчи-Нагояагийн Азийн наадмын хамгийн үнэ цэнтэй эмэгтэй тамирчин буюу MVP-ээр тодорсон байна.
2028 оны олимпын хүчтэй өрсөлдөгчөөр нэрлэгдэж эхлэв
13 настай тамирчны үзүүлсэн амжилт спортын хүрээнийхний анхаарлыг аль хэдийн татжээ. Түүнийг 2028 онд болох Лос Анжелесийн олимпын наадамд медалийн төлөө өрсөлдөх боломжтой хүчтэй тамирчдын нэг гэж нэрлэж эхэлсэн байна.
Юй Зиди өнгөрсөн жил 12 настайдаа буухиа сэлэлтийн төрөлд хүрэл медаль хүртсэнээр усанд сэлэлтийн дэлхийн аварга шалгаруулах тэмцээний түүхэнд медаль хүртсэн хамгийн залуу тамирчин болж байв.
Юй Зиди өөрийгөө онцгой авьяастан гэж үздэггүй
Азийн наадмын хамгийн үнэ цэнтэй эмэгтэй тамирчнаар шалгарсан ч Юй Зиди өөрийгөө бусдаас онцгой авьяастай гэж боддоггүй гэдгээ хэлжээ.
Тэрбээр:
“Би цаашид шаргуу бэлтгэл хийж, өөрийгөө сорьж, Азийн залуу тамирчидтай хамтран ажиллах болно. Ингэснээр илүү олон залууст спортоор хичээллэх, ялангуяа усанд сэлэлтэд дурлах урам зориг өгмөөр байна” гэжээ.
Эрэгтэй MVP-ээр Тайландын Бунсон Пурипол тодров
Айчи-Нагояагийн Азийн наадмын хамгийн үнэ цэнтэй эрэгтэй тамирчнаар Тайландын гүйлтийн тамирчин Бунсон Пурипол шалгарсан байна.
20 настай Бунсон Пурипол MVP шагналын хамт авсан 25 мянган ам.долларын мөнгөн шагналаа гэр бүлдээ болон цаашдын зорилгодоо зарцуулахаар төлөвлөж байгаагаа хэлжээ.
