Иргэд саналаа цахимаар өгөх боломжтой болов
Иргэдийн санал, хүсэлт, санаачилгыг төрийн шийдвэр гаргалтад тусгах зорилготой E-Zasag платформыг хэрэглээнд нэвтрүүллээ.
Засгийн газрын хэвлэл мэдээлэл, олон нийттэй харилцах газраас мэдээлснээр, уг платформоор дамжуулан иргэд нийтийн ашиг сонирхолд хамаарах асуудлаар саналаа цахимаар илгээж, хэлэлцүүлэгт оролцох боломжтой болж байна.
E-Zasag дээр мэдээллийг ил тод байршуулна
Шинэ системд төрийн байгууллагуудтай холбоотой мэдээ, мэдээллийг ил тод байршуулах аж. Ингэснээр иргэд тухайн асуудлын талаар мэдээлэл авч, санал өгөх, дэмжих, хэлэлцүүлэгт оролцох нөхцөл бүрдэх юм.
Тодорхой санал, санаачилга 20 мянган иргэний дэмжлэг авсан тохиолдолд Засгийн газрын хуралдаанаар хэлэлцэгдэх боломжтой болно.
Сайдууд, Засаг дарга нар, агентлагийн дарга нарт үүрэг өгчээ
Засгийн газрын бүрэн эрхийн хүрээнд хамаарах, олон нийтийн ашиг сонирхлыг хөндсөн асуудлыг төлөвлөх, боловсруулах, хэрэгжүүлэхдээ иргэдийн саналыг авах ажлыг e-zasag.mn системээр зохион байгуулахаар болжээ.
Мөн Засгийн газрын гишүүд, аймаг, нийслэлийн Засаг дарга нар болон агентлагийн дарга нарт байгууллагынхаа вэб сайтад e-zasag.mn цэс үүсгэж, платформтой холбох арга хэмжээ авахыг даалгасан байна.
Иргэдийн оролцоонд суурилсан шийдвэр гаргалтыг дэмжинэ
E-Zasag платформ нь иргэдийн санал, хүсэлт, санаачилгыг нэг дор хүлээн авах, нийтийн хэлэлцүүлэг болон санал асуулгыг нээлттэй зохион байгуулах зориулалттай.
Ингэснээр төрийн байгууллагууд шийдвэр гаргахдаа иргэдийн байр суурийг илүү өргөн хүрээнд авч үзэх боломжтой болж байна.
Саналын шийдвэрлэлтийн явцыг нээлттэй харуулна
Уг системийн бас нэг чухал боломж нь иргэдийн гаргасан саналын хэрэгжилт, шийдвэрлэлтийн явцыг нээлттэй мэдээлэх явдал юм.
Иргэд өөрсдийн дэмжсэн эсвэл гаргасан санаачилга ямар шатанд байгаа, хэрхэн хэлэлцэгдэж буйг цахимаар хянах боломжтой болохоор төлөвлөжээ.
Төр, иргэний харилцааг цахим хэлбэрээр ойртуулна
E-Zasag платформ нь төр, иргэн, байгууллагын хамтын ажиллагааг сайжруулах, төрийн үйлчилгээг илүү нээлттэй, оролцоотой болгох зорилготой.
Цаашид иргэдийн бодит санал, санаачилга төрийн бодлого, шийдвэрт тусах боломжийг нэмэгдүүлж, цахим засаглалын шинэ шатны нэг хэрэгсэл болох хүлээлттэй байна.
