Казахстан дахь тэмцээнээс Гран при хүртсэний дараах хэвлэлийн хурал
Казахстан улсад зохион байгуулагдсан олон улсын “Silk Way Star” уралдаанаас “Гран при” шагнал хүртсэн дуучин Ч.Мишээл өнөөдөр /2025.12.15/ хэвлэлийн бага хурал хийж, тэмцээний явц, уран бүтээлийн чиглэл, цаашдын төлөвлөгөөгөө танилцууллаа.
ГХЯ-ны байр суурь: соёлын дипломат харилцаанд чухал алхам
Арга хэмжээний үеэр ГХЯ-ны хэвлэлийн төлөөлөгч Р.Нямдаваа “Монгол Улсын Төв Азийн орнууд руу чиглэсэн бодлого сүүлийн он жилүүдэд идэвхжиж байгаа. Соёлын дипломат харилцаа бол ард иргэдийн хоорондын ойлголцол, итгэлцлийг бэхжүүлэх чухал алхам юм. Тийм ч утгаар “Silk Way Star” уралдаанаар Монголын соёл, урлагийг Казахстан улсад, Төв Азид бүс нутгийн хэмжээнд таниулахад чухал алхам болсон. Иймд соёлын дипломат ажиллагааг хэрэгжүүлэх үйлсэд үнэтэй хувь нэмэр оруулсан уран бүтээлчдээ баярлалаа” гэв.
Менежмент ба хэв маяг: язгуур урлагийг электрониктой хослуулдаг
Дуучин Ч.Мишээлийн менежер түүнийг 2022 оны сүүлээс дэмжин хамтарч ажиллаж эхэлснээ дурдсан бөгөөд Ч.Мишээл Монголын язгуур урлагийн элементүүдийг өөр урсгалтай, тэр дундаа электроник хөгжимтэй уялдуулсан өнгө төрхөөр бүтээлүүдээ туурвидаг гэж мэдээллээ. Энэ чиглэлээр олон уран бүтээл нь бэлэн болсон ч одоогоор бүрэн хэмжээнд цацагдаагүй дуунууд ч байгаа аж.
“Бундан улаан”-аас эхэлсэн сонирхол: уртын дууны элементийн нөлөө
Тэмцээний эхний шатанд ямар бүтээл сонгож дуулсан, тэр нь хэрхэн анхаарал татсан талаар Ч.Мишээл дараах тайлбарыг өглөө.
Дуучин Ч.Мишээл “Эхний шатанд би өөрийн “Бундан улаан” гэх дуугаа дуулсан. Уг дуунд уртын дууны элемент орсон байдаг. Тэр үеэс эхлээд Монгол элементтэй дуулалтыг дуулж эхэлснээр шүүгчид болон бусад оролцогчид “Заагаад өгөөч, би дуулж чадах болов уу” зэргээр их сонирхож эхэлсэн. Мэдээж хэрэг Монгол уртын дууг хаана ч дуулсан маш сонирхолтой, хүний сэтгэлийг татах увдистай, маш гайхалтай урлаг учраас уран бүтээлдээ заавал шингээх ёстой гэдгээ мэдэж байсан.
Тэмцээний үеэр ч гэсэн уртын дуу дуулах үед хүмүүс маш их гайхширч байгаа харц нь харагддаг. Тийм ч учраас хэрэв би сүүлийн шатандаа шалгарч чадвал маш гоё уртын дууны элементтэй дууг заавал дуулна гэж бодсон.
Энэ шагналыг хүртэхэд шүүгчдээс гадна дэлхий даяар оршин сууж буй монголчууд болон Казахстаны ард түмэн өөрсдийн ахан дүүс гэж боддог шигээ намайг хайрлаж, маш их дэмжсэнд баяртай байгаа.
Тэмцээнд оролцоход Дуучин Б.Сарантуяа эгчийн “Тэмцээнд оролцож байгаа нь хангалттай том зүйл учраас өөрийгөө харуулаарай” зэргээр дэмжиж байсан нь миний сэтгэлзүйг маш тогтвортой байлгасан. Түүнчлэн би энэ тэмцээнд ээжтэйгээ хамт явсан. Маш хүчтэй багтай явсан” гэв.
Мэргэжлийн төгсөлт, шагнал, шинэ уран бүтээлийн төлөвлөгөө
Ч.Мишээл уртын дууны мэргэжлээр энэ хавар Цогтсайхан багшийн удирдлага дор төгссөнийг мөн тодотголоо. Түүнчлэн тэрбээр Казахстаны Засгийн газраас Хоёрдугаар Найрамдлын одонгоор шагнагдсан бөгөөд цаашид уран бүтээлээ тэлэхээр Казах хэл дээрх дуугаа бичүүлж, клипээ хийж дуусгасан бөгөөд удахгүй цацагдах мэдээлэл байна.
