Япон Фобосоос чулуу, элс цуглуулахаар төлөвлөжээ
Японы Сансар судлалын агентлаг Ангараг гаргийн нэгэн дагуулаас чулуу, элс зэрэг дээж цуглуулж, дэлхийд авчрах зорилготой нисгэгчгүй сансрын хөлөг хөөргөхөөр төлөвлөж байгаагаа зарлалаа.
Энэхүү хөлгийг Ангарагийн сар судлалын хөтөлбөрийн хүрээнд 10 дугаар сарын 20-ны өглөөний 04:41 цагт Японы баруун өмнөд нутаг дахь Танэгашима аралд байрлах “Танэгашима” сансрын төвөөс хөөргөхөөр товложээ. Хөөргөлтөд №10 дугаартай “H3” пуужинг ашиглах юм байна.
Хөөргөлт өмнө нь хойшилж байжээ
Уг сансрын хөлгийг анх 2024 онд хөөргөхөөр төлөвлөж байсан ч өнгөрсөн онд №1 дугаартай “H3” пуужингийн анхны нислэг амжилтгүй болсон тул хугацааг хойшлуулсан байна.
Одоо төлөвлөгөөний дагуу нислэг амжилттай хэрэгжвэл Японы хөлөг Ангарагийн том дагуул болох Фобос руу чиглэнэ. Фобос нь Ангарагийн гадаргуугаас ойролцоогоор 6000 км-ийн зайд тойрон эргэлддэг бөгөөд 20-30 км орчим голчтой хоёр дагуулынх нь том нь юм.
Сансрын хөлөг 2031 онд дэлхийд буцаж ирнэ
Японы хөлөг Фобосоос дээж авсны дараа 2031 онд дэлхийд эргэн ирэхээр төлөвлөгдсөн байна. Хэрэв энэ даалгавар амжилттай хэрэгжвэл Ангарагийн дагуулаас дээж авчирсан анхны түүхэн тохиолдол болох юм.
Ангарагийн сар судлалын хөтөлбөр нь Ангарагийн дагуулуудын гарал үүслийг судлах, мөн ирээдүйн сансрын судалгаанд хэрэглэх шинэ технологиудыг хөгжүүлэх зорилготой олон улсын хамтарсан төсөл юм.
Хөлөг гурван үндсэн модультай
Сансрын аппарат нь Ангараг руу нисэх, судалгааны дээжийг олж илрүүлэх, дэлхий рүү буцах нислэгт зориулагдсан гурван үндсэн модультай ажээ. Хөөрөх үеийн нийт жин нь 4480 кг байна.
Буултын дөрвөн хөлтэй уг төхөөрөмжийн өндөр ойролцоогоор 5.3 метр, харин нарны зайн хавтангаа дэлгэсэн үед өргөн нь 9 метр орчим хүрэх юм.
Фобос дээр тусгай явагч төхөөрөмж ажиллана
Бүх зүйл төлөвлөсний дагуу өрнөвөл сансрын хөлөг хөөрснөөсөө хойш жил орчмын дараа Ангарагийн тойрог замд орж, ажиглалт хийж эхэлнэ.
Дараагийн шатанд Франц, Германы хамтран бүтээсэн сарнаа явагч төхөөрөмж Фобос дээр газардаж, ойролцоогоор 10 грамм хэмжээтэй элсний дээж авах аж.
Дээж бүхий капсул Австралид бууна
Дэлхий рүү буцах үед сансрын хөлөг Фобосоос авсан дээж бүхий капсулыг Австралийн нутагт буулгахаар төлөвлөжээ.
Энэхүү хөтөлбөр амжилттай болбол Ангарагийн дагуулуудын гарал үүсэл, бүтэц, Нарны аймгийн эхэн үеийн түүхийг судлахад чухал мэдээлэл өгөхөөс гадна ирээдүйн сансрын нислэгийн технологид томоохон ахиц авчрах боломжтой юм.
