2026 оны эхний хагаст 91.5 тэрбум төгрөг олгожээ
Боловсролын яам болон харьяа агентлагуудын удирдлагууд 2026-2027 оны хичээлийн жилийн бэлтгэл ажлын талаар мэдээлэл өгөх үеэр Боловсролын зээлийн сангийн санхүүжилтийн нөхцөл байдлыг танилцууллаа.
Тус сан 2026 оны эхний хагаст нийт 91.5 тэрбум төгрөгийн санхүүжилт олгосон байна. Үүний улмаас энэ оны үлдсэн хугацаанд олгох боломжтой санхүүжилтийн хэмжээ хязгаарлагдмал болжээ.
Квотод багтсан суралцагчдын санхүүжилтийг бүрэн шийдвэрлэсэн
Боловсролын зээлийн сангийн Ажлын албаны даргын үүрэг гүйцэтгэгч П.Зохихсүрэнгийн мэдээлснээр, 2025 онд төсөв батлуулахдаа квотын тоог бага байхаар төлөвлөсөн учраас энэ жил гүйцэтгэлийг тухайн квотын хүрээнд олгосон байна.
Тэрээр “Оны эхний хагаст 91.5 тэрбум төгрөгийн санхүүжилтийг олгосон тул энэ жил үлдэж буй хугацааны санхүүжилт маш бага. БЗС-гийн хувьд санхүүжилтийн эх үүсвэр тулгамдаж байгаа. 2025 онд төсвөө батлуулахдаа квотоо бага байхаар төлөвлөж батлуулсан тул энэ жил гүйцэтгэлийг квотоор олгосон. Квотод багтсан суралцагчдад санхүүжилтийг бүрэн олгосон. Гэтэл квотод багтаагүй ч Засгийн газрын тогтоолоор батлагдсан журмын шалгуур шаардлагыг хангасан 6800 гаруй суралцагчийн асуудал үүссэн. Тухайлбал, Боловсролын ерөнхий хуульд зааснаар 15-аас дээш жил ажиллаж буй багш, ажилтны хүүхдэд төрөөс дэмжлэг үзүүлдэг. Иймд квотод багтаагүй 506 суралцагчийн 1.45 тэрбум төгрөгийн санхүүжилтийг олгохоор шийдвэрлэсэн. Орон нутгийн их, дээд сургуульд суралцдаг 1692 суралцагчид шаардлагатай 3.5 тэрбум төгрөгийн санхүүжилт олгохоор ажиллаж байна. 2026 оны хавар сургуулиа төгссөн 502 суралцагчийн нэг тэрбум орчим төгрөгийн санхүүжилтийг шийдвэрлэнэ. Хаврын квотод багтаж чадаагүй 6800 суралцагчаас 2700-гийнх нь асуудлыг шийдвэрлэхээр ажиллаж байгаа. Харин 4100 суралцагч өөрсдөө зардлаа хариуцах нөхцөл үүссэн” гэв.
6800 гаруй суралцагчийн асуудал үүссэн байна
Мэдээллээс харахад, квотод багтаагүй ч Засгийн газрын тогтоолоор баталсан журмын шалгуур шаардлагыг хангасан 6800 гаруй суралцагчийн санхүүжилтийн асуудал гарчээ.
Тэдгээрээс 2700 орчим суралцагчийн санхүүжилтийг шийдвэрлэхээр ажиллаж байгаа бол үлдсэн 4100 суралцагч сургалтын зардлаа өөрсдөө хариуцах нөхцөл үүссэн байна.
Тухайлбал, Боловсролын ерөнхий хуульд заасны дагуу 15-аас дээш жил ажилласан багш, ажилтны хүүхдэд төрөөс дэмжлэг үзүүлдэг. Энэ хүрээнд квотод багтаагүй 506 суралцагчийн 1.45 тэрбум төгрөгийн санхүүжилтийг олгохоор шийдвэрлэжээ.
Орон нутгийн их, дээд сургуулийн суралцагчдад санхүүжилт олгохоор ажиллаж байна
Мөн орон нутгийн их, дээд сургуульд суралцаж буй 1692 суралцагчид шаардлагатай 3.5 тэрбум төгрөгийн санхүүжилтийг олгохоор ажиллаж байгаа аж.
Үүнээс гадна 2026 оны хавар сургуулиа төгссөн 502 суралцагчийн нэг тэрбум орчим төгрөгийн санхүүжилтийг шийдвэрлэхээр төлөвлөжээ.
2025 оны дутуу санхүүжилтийг нөхөж олгосон байна
2025 онд дотоодын сургалтын байгууллагад суралцаж буй 16,548 иргэнд 39.8 тэрбум төгрөг, гадаадад суралцаж буй 1,254 суралцагчид 66.8 тэрбум төгрөгийн санхүүжилт олгосон байна.
Харин 2026 оны хоёрдугаар сараас зургаадугаар сар хүртэлх хугацаанд буюу хичээлийн жилийн хоёрдугаар улиралд нийт 91.5 тэрбум төгрөгийн санхүүжилт олгожээ. Энэ нь 2025 онд бүрэн олгож амжаагүй, дутуу үлдсэн санхүүжилтийг нөхөж олгосон гэсэн үг юм.
Дотоодын сургалтын байгууллагын суралцагчдын зардлыг нөхжээ
Энэ хүрээнд дотоодын сургалтын байгууллагад суралцаж буй 2025 оны 15,880 суралцагч болон 2026 оны 8,653 суралцагчийн зардлыг 2026 оны эхний хагаст олгосон байна.
Ийнхүү Боловсролын зээлийн сан энэ оны эхний зургаан сард их хэмжээний санхүүжилт гаргасан тул үлдсэн хугацаанд эх үүсвэрийн хүндрэл үүсэж, квотод багтаагүй олон суралцагчийн сургалтын төлбөрийн асуудал тодорхойгүй хэвээр байна.
