Хөл бөмбөгийн дэлхийн аварга шалгаруулах тэмцээн эхлэхэд ердөө 50 хоног үлдээд буй энэ үед Олон улсын хөл бөмбөгийн холбоо буюу ФИФА тасалбарын борлуулалтын эцсийн шатыг эхлүүлжээ. Энэ удаад нийт 104 тоглолтын тасалбар худалдаанд гарч байгаа бөгөөд “хэн түрүүлж бүртгүүлсэн нь авна” гэсэн зарчмаар борлуулах юм байна.
АНУ, Канад, Мексикт болох тэмцээний сүүлийн тасалбарууд худалдаанд гарчээ
Ирэх зургаадугаар сарын 11-нд АНУ, Канад, Мексикт эхлэх дэлхийн аваргын тэмцээний тасалбарын хамгийн сүүлийн шатны борлуулалт ийнхүү эхэлж байгааг ФИФА албан ёсоор мэдэгдсэн байна.
ФИФА-гийн өгсөн мэдээллээр, өнөөдрийн байдлаар нийт зургаан сая орчим тасалбараас таван сая гаруй нь хэдийн борлуулагджээ. Одоо үлдэж буй тасалбарын хүрээнд 1-3 дугаар зэрэглэлийн суудлууд, мөн тоглолтын байршлаас шалтгаалсан талбайн хажуугийн хэсгийн суудлууд худалдаанд гарах аж.
Финал хүртэл нэмэлт багц тасалбар үе шаттай худалдаалагдана
Холбооны тайлбарласнаар, хэрэв тасалбар бүрэн дуусахгүй байх, эсвэл буцаалт хийгдэх зэрэг нөхцөл үүсвэл долоодугаар сарын 19-нд болох финалын тоглолт хүртэл нэмэлт тасалбарын багцуудыг шат дараатайгаар дахин худалдаанд гаргах боломжтой юм байна.
Тасалбарын үнийн асуудал өмнө нь ч шүүмжлэл дагуулж байсан. АНУ-ын зарим хууль тогтоогч ФИФА-гийн ашиглаж буй “динамик үнэ тогтоох” аргачлал нь дэлхийн аваргын тоглолтыг жирийн хөгжөөн дэмжигчдэд улам бүр хүртээмжгүй болгож байна гэж үзээд, үнийг бууруулахыг уриалсан байна.
ФИФА үнээ автомат бус, эрэлт ба үлдэгдэлд тулгуурлан өөрчилдөг гэж тайлбарлав
Энэ шүүмжлэлийн хариуд ФИФА “хувьсах үнэ тогтоох” механизмыг хэрэглэж байгаагаа мэдэгджээ. Өөрөөр хэлбэл, тасалбарын үнийг автомат системээр биш, харин эрэлт болон үлдсэн нөөцийн хэмжээнд тулгуурлан гар аргаар тохируулж өөрчилдөг гэж тайлбарласан байна.
Мөн өнгөрсөн оны 12 дугаар сард “Supporter Entry Tier” ангиллын хязгаарлагдмал тооны тасалбарыг 60 ам.доллараас эхлэх үнээр зах зээлд гаргажээ. Эдгээр тасалбар нь оролцогч гишүүн холбоодод хуваарилсан нийт тасалбарын ойролцоогоор 10 хувийг бүрдүүлж байгаа аж.
Тасалбарын энэ удаагийн борлуулалтыг дөрөвдүгээр сарын 22-ны лхагва гарагт эхлүүлсэн байна.
