Вакум нэрлэгийн цамхгийг үйлдвэрийн талбай руу тээвэрлэж байна
Монгол Улсад баригдаж буй Газрын тос боловсруулах үйлдвэрийн гадаадад үйлдвэрлэсэн техник, тоног төхөөрөмж, багц байгууламжууд ээлж дараалан ирж, үйлдвэрийн талбай дахь угсралтын ажил эрчимжиж байна.
Хоёр сарын өмнө үйлдвэрийн талбайд Атмосферийн нэрлэгийн цамхаг буюу CDU Column-ийг хүлээн авсан бол энэ удаад Энэтхэгт үйлдвэрлэсэн Вакум нэрлэгийн цамхаг буюу VDU Column Монгол руу ирж байна.
Энэтхэгээс Тяньжин боомтоор дамжин Дорноговийг зорилоо
VDU Column-ийг Энэтхэгийн Мумбай боомтоос Арабын тэнгисээр далайгаар тээвэрлэн БНХАУ-ын Тяньжин боомтод буулгажээ.
Тэндээс уг аварга байгууламжийг хүнд даацын ачааны машинаар Дорноговь аймаг дахь Газрын тос боловсруулах үйлдвэрийн талбай руу тээвэрлэх ажил эхэлсэн байна.
Энэ нь үйлдвэрийн үндсэн технологийн томоохон тоног төхөөрөмжүүд Монголд ирж буй чухал үе шат болж байна.
Үйлдвэрийн хамгийн өндөр байгууламжууд угсрагдана
Атмосферийн нэрлэгийн цамхаг болон Вакум нэрлэгийн цамхаг нь Газрын тос боловсруулах үйлдвэрийн хамгийн өндөр байгууламжуудын тоонд багтдаг.
Эдгээрийг өргөж байрлуулах, угсрах ажил нь өндөр хүчин чадалтай техник шаардсан нарийн ажиллагаа юм. Тиймээс цамхгуудыг суурилуулахад 1250 тоннын даацтай тусгай кран ашиглахаар төлөвлөжээ.
1250 тоннын даацтай кран 42 машинаар ирнэ
Уг аварга механизмыг БНХАУ-ын Zoomlion Heavy Industry Science and Technology Co., Ltd. компанид захиалан үйлдвэрлүүлсэн байна.
1250 тоннын даацтай краныг нийт 42 хүнд даацын ачааны машинаар үйлдвэрийн талбай руу тээвэрлэх ажил мөн эхэлжээ. Энэ кран нь үйлдвэрийн хамгийн том, хүнд байгууламжуудыг аюулгүй өргөж угсрахад ашиглагдах юм.
Үйлдвэрийн бүтээн байгуулалт шинэ шатанд орж байна
Газрын тос боловсруулах үйлдвэрийн гол тоног төхөөрөмжүүд ийнхүү Монголд ирж, угсралтын ажил эрчимжиж байгаа нь төслийн бүтээн байгуулалт дараагийн чухал шатанд шилжсэнийг харуулж байна.
Дорноговь аймаг дахь үйлдвэрийн талбайд томоохон байгууламжуудыг өргөж суурилуулах ажил эхэлснээр Монголын газрын тос боловсруулах салбарын түүхэн бүтээн байгуулалт улам бодитой болж байна.
