ОХУ-Украины дайн цаашид эрчимжиж болзошгүй гэсэн зах зээлийн болгоомжлол улаанбуудайн үнэд нөлөөлж, фьючерс ханш гурав дахь өдрөө дараалан өссөн талаар Bloomberg TV Mongolia мэдээлжээ.
Даваа гарагт Чикагогийн Таваарын бирж дээр улаанбуудайн фьючерс үнэ нэг орчим хувиар нэмэгдэж, нэг бушель нь 6.8 ам.долларт хүрсэн байна. Ингэснээр улаанбуудайн ханш сүүлийн нэг сарын хамгийн удаан үргэлжилсэн өсөлтийн цуваа үзүүлэхээр байгаа аж.
Хар тэнгисийн тээвэр зах зээлийн гол эрсдэл хэвээр байна
Эх сурвалжид дурдсанаар ОХУ-Украины дайны улмаас дэлхийн үр тарианы худалдааны гол гарцуудын нэг болох Хар тэнгисээр дамжих нийлүүлэлт долдугаар сараас хойш доголдсон байна.
Хэрэв мөргөлдөөн улам хурцадвал тус бүс нутгаар үр тариа тээвэрлэх урсгалыг хамгаалах Туркийн дипломат болон зуучлалын хүчин чармайлтад нэмэлт хүндрэл учирч болзошгүй гэж зах зээлд болгоомжилж байгаа аж.
Туркийн зуучлал нийлүүлэлтийг сэргээж болох ч хугацаа шаардана
Туркийн оролцоотой хэлэлцээний үр дүнд Хар тэнгисийн нийлүүлэлт сэргэх боломжтой ч тохиролцоонд хүрэхэд хэдэн сар шаардагдаж магадгүй гэж шинжээчид үзэж байна.
“CRM Agcommodities” компанийн шинжээчдийн тайлбарласнаар хэлэлцээ удааширч, нийлүүлэлтийн доголдол үргэлжилбэл улаанбуудайн премиум үнэ буурах боломж хязгаарлагдаж, ханш өндөр түвшинд хадгалагдах эрсдэлтэй байна.
Ийнхүү геополитикийн тодорхой бус байдал болон Хар тэнгисийн тээврийн саатал улаанбуудайн зах зээлийн гол хөдөлгөгч хүчин зүйлсийн нэг хэвээр байна.
Эх сурвалж: Bloomberg TV Mongolia
