Шашин, соёлын наадам Хүй долоон худагт болно
Нийслэл Улаанбаатар хотын иргэдийн өдөрт зориулсан “Хүрээ цам-Даншиг наадам 2026” шашин, соёлын наадам зургадугаар сарын 27-28-ны өдрүүдэд Хүй долоон худагт зохион байгуулагдана.
Наадам зургадугаар сарын 27-ны 10:00 цагаас Очирваань бурхны тахилга болон эзэн богд Чингис хааны сан тахилгаар албан ёсоор эхлэх ажээ.
Энэхүү арга хэмжээ нь уламжлалт шашин, соёлын зан үйл, үндэсний спорт, ардын урлаг, худалдаа үйлчилгээ зэргийг нэг дор төвлөрүүлсэн өргөн хүрээтэй наадам болох юм.
Бөх, харваа, ардын авьяастнуудын тоглолт болно
“Хүрээ цам-Даншиг наадам 2026”-ын үеэр улс, аймаг, цэргийн цолтой хүчит бөхийн барилдаан зохион байгуулагдана.
Мөн сур харваа, шагайн харваа, сээр цохих тэмцээн зэрэг уламжлалт спортын төрлүүдээр өрсөлдөөн болно.
Үүнээс гадна жижиг, дунд бизнес эрхлэгчдийн үзэсгэлэн худалдаа, есөн дүүргийн ардын авьяастнуудын урлагийн тоглолт наадмын хөтөлбөрт багтжээ.
Цам харайх ёслол болон шашны зан үйлүүд болно
Наадмын шашин, соёлын хөтөлбөрт цам харайх ёслол онцгой байр суурь эзэлнэ.
Мөн лам нарын дунд ном хаялцах болон мэтгэлцээний тэмцээн, балин тосон урлалын уралдаан зохион байгуулагдах юм.
Түүнчлэн сор залах, соёмбот туг залах, шашны сүлд дуулал эгшиглүүлэх зэрэг уламжлалт зан үйлүүд наадмын үеэр болохоор төлөвлөгджээ.
Их Хүрээ цамыг 1999 онд сэргээн залжээ
Их Хүрээ цамыг МБШТ-Гандантэгчэнлин хийд 1999 онд уламжлалт ёс дэг, зан үйлээр нь сэргээн залсан түүхтэй.
Энэхүү нандин өвийг дахин сэргээх үйл хэрэгт тус хийдийн ахмад хувраг агсан Д.Данзан, Н.Сэрээтэр нар үнэтэй хувь нэмэр оруулсан гэж үздэг байна.
Тиймээс “Хүрээ цам-Даншиг наадам” нь зөвхөн баяр наадам бус, Монголын шашин, соёлын өвийг хадгалж, олон нийтэд таниулах чухал арга хэмжээ юм.
Худалдаа, үйлчилгээний талбайг найман секторт хуваана
Наадмын үеэр худалдаа, үйлчилгээний талбайг соёл урлагийн болон худалдаа, үйлчилгээний гэсэн хоёр үндсэн хэсэгтэй найман секторт хуваан зохион байгуулахаар төлөвлөжээ.
Нийт 170 гаруй цэгт иргэн, аж ахуйн нэгжүүд худалдаа, үйлчилгээ эрхлэх боломжтой байх юм.
Гэхдээ ил задгай, зөвшөөрөлгүй худалдаа эрхлэхийг хориглож байгааг зохион байгуулагчид анхааруулжээ.
Секторуудын зохион байгуулалт
Наадмын талбайн худалдаа, үйлчилгээ дараах байдлаар зохион байгуулагдана.
- “A” секторт гар урлал, бэлэг дурсгал, соёлын бараа, жижиг, дунд үйлдвэрлэл эрхлэгчдийн бүтээгдэхүүн
- “B”, “C”, “D”, “E” секторт худалдаа, хоол үйлдвэрлэл, үйлчилгээ
- “F” секторт хүүхдийн хөдөлгөөнт тоглоом болон хүүхэд хуурайлах өрөө
- “G”, “H” секторт есөн дүүргийн соёл, хүндэтгэл, бэлтгэлийн гэр болон асар байрлана
Өнөөдрийн байдлаар “A” секторт 50, “B”, “C”, “D”, “E” секторт 85, “F” секторт 30 буюу нийт 165 цэгт иргэн, хуулийн этгээд худалдаа, үйлчилгээ гаргахаар бэлтгэж байгаа аж.
Наадам руу үнэгүй автобус үйлчилнэ
“Хүрээ цам-Даншиг наадам 2026”-ыг зорих иргэдэд зориулан автобус үнэ төлбөргүй үйлчлэхээр болжээ.
Энэ нь Хүй долоон худаг руу зорчих иргэдийн хөдөлгөөнийг хөнгөвчлөх, наадмын хүртээмжийг нэмэгдүүлэх зорилготой юм.
Зургадугаар сарын 27-28-нд болох уг наадам шашин, соёлын өв, үндэсний уламжлал, нийслэлийн иргэдийн баярын уур амьсгалыг нэг дор цогцлоох томоохон арга хэмжээ болохоор байна.
