Сэлэнгэ аймагт хүрээлэн байгаа орчны эсрэг гэмт хэрэгт холбогдсон хоёр хэргийг анхан шатны шүүх 2026 оны есдүгээр сарын 23-наас аравдугаар сарын 2-ны хооронд шийдвэрлэжээ. Хэргүүдийг Сэлэнгэ аймгийн прокурорын газраас яллах дүгнэлт үйлдэн шүүхэд шилжүүлсэн байна.
Шаамар суманд хууль бусаар мод бэлтгэсэн хэрэгт холбогдсон Э.Э-д шүүхээс торгох ял оногдуулж, байгаль орчинд учруулсан хохирол болон гэмт хэрэгт ашигласан тээврийн хэрэгслийн үнийг гаргуулахаар шийдвэрлэжээ.
Зулзаган нарс модыг гэрчилгээгүй тээвэрлэсэн байна
Э.Э нь 2026 оны тавдугаар сарын 15–18-ны өдрүүдэд Сэлэнгэ аймгийн Шаамар сумын нутаг дэвсгэрт 2–3 метр орчим өндөртэй олон тооны зулзаган нарс модыг гарал үүслийн гэрчилгээгүйгээр том оврын тээврийн хэрэгслээр тээвэрлэсэн хэрэгт холбогджээ.
Прокуророос түүнд Эрүүгийн хуулийн 24.6 дугаар зүйлийн 1 дэх хэсэгт заасан хууль бусаар мод бэлтгэх гэмт хэрэгт яллах дүгнэлт үйлдсэн байна.
Шүүх Э.Э-г гэм буруутайд тооцож:
- 3 сая төгрөгөөр торгох,
- байгаль орчинд учруулсан 177.6 сая төгрөгийн хохирлыг төлүүлэх,
- гэмт хэрэг үйлдэхдээ ашигласан тээврийн хэрэгслийн 72.1 сая төгрөгийн үнийг гаргуулах
шийдвэр гаргажээ. Хохирол болон тээврийн хэрэгслийн үнэлгээг Байгаль орчин, уур амьсгалын санд төвлөрүүлэхээр болсон байна.
Хууль бусаар ашигт малтмал хайсан иргэнийг нэг жил тэнсэв
Мөн К.Х нь 2026 оны зургаадугаар сарын 19-нд Сэлэнгэ аймгийн Ерөө сумын нутаг дэвсгэрт хууль бусаар ашигт малтмал олборлох зорилгоор газрын хэвлийд халдсан хэрэгт холбогджээ.
Түүнд Эрүүгийн хуулийн 24.2 дугаар зүйлийн 1 дэх хэсэгт заасан хууль бусаар ашигт малтмал хайх, олборлох, ашиглах гэмт хэрэгт яллах дүгнэлт үйлдэн шүүхэд шилжүүлсэн байна.
Шүүх К.Х-г гэм буруутайд тооцож, хорих ял оногдуулахгүйгээр нэг жилийн хугацаагаар тэнсэж, гэмт хэрэг үйлдэхдээ ашигласан техник хэрэгслийг улсын орлого болгохоор шийдвэрлэжээ. Мөрдөн шалгах ажиллагааны явцад учруулсан 1.5 сая төгрөгийн хохирлыг К.Х-ээр нөхөн төлүүлсэн байна.
