Хятадын робот техникийн UBTECH Robotics компани Гуанши Жуан үндэстний өөртөө засах орны Люйжөү хотод аж үйлдвэрийн зориулалттай хүн дүрст робот үйлдвэрлэх шинэ супер ухаалаг үйлдвэрээ ашиглалтад оруулжээ.
Есдүгээр сарын 12-нд үйлдвэрлэлээ эхлүүлсэн тус үйлдвэр жилд 10 мянгаас дээш хүн дүрст робот үйлдвэрлэх хүчин чадалтай байхаар төлөвлөгдсөн байна. UBTECH болон Люйжөү хотын тал үүнийг 10 мянгатын түвшний хүн дүрст роботын үйлдвэрлэлд зориулагдсан дэлхийн анхны ухаалаг үйлдвэр хэмээн танилцуулжээ.
10 минут тутамд нэг робот угсарна
Шинэ үйлдвэр 1.4 га талбайг хамрах бөгөөд 13.8 метр өндөр барилгатай. Энд UBTECH-ийн Walker S болон Cruzr цувралын хүн дүрст роботуудыг үйлдвэрлэхээр төлөвлөсөн байна.
Үйлдвэрлэлийн шугам бүрэн хүчин чадлаараа ажиллах үед ойролцоогоор 10 минут тутамд нэг робот угсрах боломжтой аж.
Ингэснээр UBTECH хүн дүрст роботын үйлдвэрлэлийг жижиг хэмжээний туршилтын шатнаас томоохон, стандартчилсан үйлдвэрлэлийн түвшинд шилжүүлэх зорилго тавьжээ.
Үйлдвэр дотор роботууд өөрсдөө ажиллана
Тус үйлдвэрийн хамгийн сонирхолтой шийдэл нь “робот робот үйлдвэрлэнэ” гэсэн зарчим юм.
Үйлдвэрийн дотоод ложистик, эд анги зөөвөрлөх, тавиур ачих, буулгах зэрэг олон ажлыг робот болон автомат тээврийн төхөөрөмжөөр гүйцэтгэхээр зохион байгуулжээ.
Үйлдвэрлэлийн бүх үйл явцыг нэгдсэн дижитал системээр удирдах бөгөөд тоног төхөөрөмж, ложистик, угсралтын шугамын ажиллагааг хооронд нь уялдуулах боломжтой байна.
Siemens технологийн түншээр оролцжээ
Төслийн технологийн түншээр Германы Siemens компани ажиллаж, хүн дүрст роботын үйлдвэрлэлд зориулсан дижитал үйлдвэрийн үндсэн шийдлүүдийг боловсруулахад хамтран оролцсон байна.
Үйлдвэрийн төлөвлөлт, үйлдвэрлэлийн урсгал болон дотоод ложистикийг нэг системээр хянахын зэрэгцээ үйлдвэрлэлийн симуляцийн технологийг ашиглаж байгаа аж.
Энэ нь бодит үйлдвэрлэл эхлэхээс өмнө шугамын ажиллагааг виртуал орчинд турших, ачаалал болон хөдөлгөөнийг тооцоолох боломж олгоно.
Хүн дүрст роботын үйлдвэрлэл шинэ шатанд гарч байна
UBTECH-ийн мэдээлснээр шинэ үйлдвэр ашиглалтад орсноор хүн дүрст роботын үйлдвэрлэл лабораторийн туршилт болон бага хэмжээгээр үйлдвэрлэх шатнаас илүү өргөн хүрээтэй, автоматжуулсан, дижитал үйлдвэрлэлийн хэлбэрт шилжиж байна.
Тус үйлдвэрээс гарах роботуудыг Люйжөү хотын автомашин, хүнд үйлдвэрлэлийн салбаруудад ашиглахаар төлөвлөжээ.
Үүнээс гадна роботуудыг Хятадын дотоодын зах зээлд нийлүүлэхийн зэрэгцээ цаашид Зүүн Өмнөд Ази болон бусад гадаад зах зээлд экспортлох зорилготой байна.
Ийнхүү Хятад хүн дүрст роботын үйлдвэрлэлийг туршилтын түвшнээс масс үйлдвэрлэл рүү шилжүүлэх томоохон алхам хийж, роботууд өөрсдөө үйлдвэрлэлийн процессын нэг хэсэг болон ажиллах шинэ загварыг хэрэгжүүлж эхэлжээ.
