Монголын хип хоп урлагийг үндэслэгчдийн нэг болох “Icetop” хамтлаг 2025 оны наймдугаар сарын 8-нд Төв цэнгэлдэх хүрээлэнд “Шүтээн минь” нэртэй томоохон тоглолтоо зохион байгуулахаар боллоо. Энэхүү тоглолт нь “Аавуудын өдөр”-ийг тохиолдуулан зохион байгуулагдаж байгаа бөгөөд жинхэнэ гудамжны хип хоп соёл, эрч хүч, шүүлтүүргүй хэмнэлийг мэдрүүлэх уур амьсгал бүрдүүлэхээр төлөвлөжээ.
Тоглолтын онцлох зүйлс:
- Америкийн алдарт “Old School” хип хоп хамтлаг “Onyx” тусгай зочноор оролцоно.
- Бүтэн 6 цагийн турш үргэлжлэх тоглолтод “Icetop” хамтлагийн сонгодог хит болон шинэ уран бүтээлүүд эгшиглэнэ.
- Талийгаач Б.Оргил-Эрдэнэ, Э.Хатанбаатар нарт зориулсан дурсамжит мөчүүдийг хиймэл оюун ухаанаар сэргээн, шүтэн бишрэгчидтэй уулзуулах технологийн туршилт хийгдэнэ.
- Никитон хамтлагийн дуучин Б.Батчулуунтай хамтарсан шинэ уран бүтээл тоглолтод анх удаа цацагдана.
- “Skin” энтертайнментаас найруулгаар ажиллаж, шинэ уур амьсгал, бүтээлч хандлага нэвтрүүлнэ.
Хамтлагийн гишүүн С.Чулуунбаатар хэлэхдээ:
“Бид энэ тоглолтод маш их ач холбогдол өгч, урт хугацаанд бэлтгэж байна. Тоглолт цагтаа эхэлж, 25 хит дуугаа дуулна. Мөн шинэ бүтээлүүдээ наадмын дараагаар цацах болно” хэмээн онцоллоо.
