Зургаадугаар сарын 2-ноос 10 хоногийн засвар эхэлнэ
“УБДС” ТӨХК-аас мэдээлснээр ирэх долоо хоногийн Мягмар гараг буюу зургаадугаар сарын 2-ноос эхлэн нийслэлийн зарим байршлын айл өрх, албан байгууллагын хэрэглээний халуун усыг түр хугацаагаар хязгаарлахаар болжээ.
Хязгаарлалт нийт 10 хоног үргэлжлэх бөгөөд энэ хугацаанд дулааны шугам сүлжээний засвар, шинэчлэлтийн ажлыг хийхээр төлөвлөсөн байна.
Халуун ус таслах байршлууд
Зургаадугаар сарын 2-12-ны хооронд дараах байршлуудын хэрэглэгчдийн халуун усыг хязгаарлана.
- Барс-2 захаас Хархорин зах хүртэлх орчим
- 1 болон 10 дугаар хорооллын авто замын урд хэсгийн хэрэглэгчид
- “Талх чихэр” ХХК орчим
- “Драгон Холдинг” ХХК орчим
- Геологийн судалгаа-шинжилгээний төв ТӨААТҮГ орчим
- Ач анагаах ухааны дээд сургууль орчмын хэрэглэгчид
- Москва хороолол
- Ханын материал орчим
- Баянхошуу орчмын хэрэглэгчид
Дулааны шугамд засвар, шинэчлэлт хийнэ
Халуун усны хязгаарлалт нь нийслэлийн дулаан хангамжийн шугам тоноглолыг засварлах ажлын хүрээнд хийгдэж байгаа юм. Энэ үеэр холбогдох байгууллагууд дулааны шугамын найдвартай ажиллагааг хангах, эвдрэл гэмтлээс урьдчилан сэргийлэх, шинэчлэл хийх ажлуудыг гүйцэтгэнэ.
Нийт найман удаагийн зогсолт хийхээр төлөвлөжээ
Нийслэлийн дулаан хангамжийн шугам тоноглолыг засварлах ажлын хүрээнд энэ улиралд нийт найман удаагийн зогсолт хийхээр төлөвлөсөн байна.
Иймээс дээрх байршлуудад амьдарч, үйл ажиллагаа явуулж буй айл өрх, байгууллагууд зургаадугаар сарын 2-12-ны хооронд халуун усны хэрэглээндээ зохицуулалт хийх шаардлагатай болж байна.
