Алдарт жүжигчний гэр бүлд шинэ гишүүн нэмэгдэв
Холливудын алдарт жүжигчин Камерон Диаз болон түүний нөхөр Бенжи Мэдден нар гурав дахь хүүхдээ өлгийдөн авсан байна. Алдарт хос гэр бүлдээ шинэ хүүхэд мэндэлсэн баярт мэдээгээ олон нийтийн сүлжээгээр дамжуулан хуваалцжээ.
53 настай жүжигчин гурав дахь удаагаа ээж болсон баяраа тэмдэглэж байгаа ч хүүхэд төрөхөөс өмнө энэ талаар олон нийтэд ямар нэгэн мэдэгдэл хийгээгүй байсан юм.
Баярт мэдээг Бенжи Мэдден зарлав
Хосын гурав дахь хүүхэд мэндэлсэн тухай мэдээг 47 настай Бенжи Мэдден өөрийн сошиал хаягаар дамжуулан зарласан байна. Мэдден нийтлэлдээ дараах үгийг бичжээ.
“Камерон бид хоёр гурав дахь хүүхэд болох Наутас Мэдден мэндэлсэнд маш их баяртай, догдолж, өөрсдийгөө азтайд тооцож байна. Дэлхийд тавтай морил, хүү минь.”
Хосын хуваалцсан мэдээллээс үзэхэд нярай болон эхийн биеийн байдал сайн байгаа аж. Камерон Диаз нөхрийнхөө нийтлэлд зүрхний тэмдэгээр хариу үлдээсэн байна.
Хүүдээ өгсөн нэр нь олны анхаарлыг татав
Шинээр мэндэлсэн хүүдээ өгсөн “Nautas” нэр олон нийтийн анхаарлыг татжээ. Энэ нэрийг “далайчин”, “чиглүүлэгч”, “аялагч” гэсэн утгатай хэмээн тайлбарлаж байгаа бөгөөд мөн “үл мэдэгдэх зүг рүү айдасгүйгээр замнадаг хүн” гэсэн утгаар ойлгож болох аж.
Камерон Диаз 51 настайдаа хоёр дахь хүүхдээ өлгийдөн авч байв
Камерон Диаз болон Бенжи Мэдден нар 2015 онд гэрлэсэн. Тэдний гэр бүлд өмнө нь 2019 онд төрсөн Раддикс, 2024 онд төрсөн Кардинал нэртэй хоёр хүүхэд байсан юм.
Ийнхүү алдарт хос гурав дахь хүүхдээ өлгийдөн авч, гэр бүл нь улам өнөр болжээ
