Парисын шүүх 2016 онд зэвсэгт дээрэмд өртсөн Америкийн телевиз, шоу бизнесийн од Ким Кардашянд нэг еврогийн нөхөн төлбөр олгох шийдвэрийг Мягмар гарагт гаргажээ. Тэрээр уг хэргийн улмаас учирсан хохирлын нөхөн төлбөрт бэлгэдлийн шинжтэйгээр нэг евро нэхэмжилсэн байсан бөгөөд шүүх хүсэлтийг нь бүрэн хангажээ.
Кардашян энэ халдлагыг өмнө нь “миний амьдралд тохиолдсон хамгийн аймшигтай үйл явдал” гэж тодорхойлж байсан юм. Өнгөрсөн онд Францын шүүх дээрэмд холбоотой найман хүнийг гэм буруутайд тооцсон байна.
Зочид буудлын ажилтанд 109 мянга гаруй евро олгоно
Шүүх зөвхөн Кардашяны нэхэмжлэлийг шийдвэрлээгүй. Хэрэг гарах үед “Hotel de Pourtales” зочид буудлын хүлээн авагчаар ажиллаж байсан хүнд 109,516 еврогийн нөхөн төлбөр олгохоор болжээ.
Тэрээр 2016 оны аравдугаар сарын 2-нд болсон дээрмийн үеэр сэтгэл санааны хүнд цочролд орсон гэж үзэн анх 550 мянган евро нэхэмжилсэн байсан юм.
Түүний өмгөөлөгч шүүхийн шийдвэрийг талархан хүлээж авснаа мэдэгдсэн байна.
Үүнээс гадна халдлага болсон зочид буудалд 50 мянган евро олгохоор шийдвэрлэжээ. Харин дээрмийн үеэр Кардашянтай хамт байсан стилист Simone Bretter мөн нэг евро нэхэмжилсэн бөгөөд шүүх түүний хүсэлтийг ч хангасан байна.
Дээрэмчид цагдаагийн хувцастай өрөөнд нь оржээ
Ким Кардашян Парисын загварын долоо хоногт оролцохоор Францад очоод байхдаа урьдчилан төлөвлөсөн зэвсэгт дээрмийн хохирогч болсон юм.
Хэрэг гарах үед цагдаагийн дүрэмт хувцастай хоёр этгээд түүний байрлаж байсан өрөөнд нэвтэрч, гар хөлийг нь хүлсний дараа үнэт эдлэлүүдийг авч зугтжээ.
Хулгайлагдсан зүйлсийн нийт үнэ ойролцоогоор зургаан сая ам.долларт хүрсэн бөгөөд тэдгээрийн дотор Кардашян тухайн орой Givenchy-ийн шоунд оролцохдоо зүүж байсан алмаазан бөгж багтаж байжээ.
Францын хэвлэлүүд “дээрэмчин өвөө нар” гэж нэрлэж байв
Хэргийг үйлдсэн хүмүүсийн дунд өндөр настай этгээдүүд олон байсан тул Францын хэвлэлүүд тэднийг “les papys braqueurs” буюу “дээрэмчин өвөө нар” хэмээн нэрлэж байжээ.
60-70 гаруй насны зургаан хамтрагчийг зэвсэгт дээрэм, хүн барьцаалах, бүлэглэн гэмт хэрэг үйлдэх зэрэг зүйл ангиар буруутган шийтгэсэн байна.
Гэхдээ мөрдөн шалгах явцад хоригдсон хугацааг нь ял эдэлсэнд тооцсон тул хэн нь ч дахин шоронд хоригдоогүй бөгөөд шүүхийн шийдвэрийг давж заалдаагүй аж.
Хулгайлагдсан үнэт эдлэлийн ихэнх нь олдоогүй
Дээрэмчид зугтахдаа санамсаргүйгээр гээсэн цөөн хэдэн эд зүйлээс бусад хулгайлагдсан үнэт эдлэл бараг олдоогүй байна.
Мөрдөн шалгах байгууллагуудын үзэж буйгаар тэд үнэт эдлэлүүдийг задалж, заримыг нь хайлуулан бэлэн мөнгө болгосон байж болзошгүй аж.
Тиймээс Кардашяны алдагдсан эд зүйлсийн ихэнхийг буцаан олж чадаагүй хэвээр байна.
Кардашян: “Би болж өнгөрсөн зүйлийг хэзээ ч мартахгүй”
Өнгөрсөн онд шүүх хурлын дараа Ким Кардашян Францын хууль сахиулах байгууллагуудад талархсан мэдэгдэл гаргаж байжээ.
Тэрээр:
“Шударга ёсыг тогтоосон Францын эрх баригчдад гүнээ талархаж байна. Энэ гэмт хэрэг миний амьдралд тохиолдсон хамгийн аймшигтай үйл явдал байсан бөгөөд надад болон миний гэр бүлд урт удаан хугацааны сэтгэлийн шарх үлдээсэн юм. Би болж өнгөрсөн зүйлийг хэзээ ч мартахгүй ч ахиц дэвшил, хариуцлагын хүчинд итгэдэг бөгөөд бүх хүмүүст эдгэрэл, илааршлыг хүсэж байна. Шударга ёс, шударга хууль эрх зүйн тогтолцоонд би үнэнч хэвээр байх болно” гэж мэдэгдсэн байна.
Ийнхүү 10 жилийн өмнөх Парисын дээрмийн хэргийн хохирол барагдуулах ажиллагаа үргэлжилж, Кардашян өөрийн хүссэнээр бэлгэдлийн нэг еврогийн нөхөн төлбөр авах болжээ.
Эх сурвалж: Associated Press
