Засгийн газар AI ногоон дата төв байгуулах бодлогоо тодорхойлжээ
Монгол Улсын Засгийн газраас AI ногоон дата төвийг эх орондоо барьж байгуулах бодлогыг тодорхойлсон талаар Цахим хөгжил, инновац, харилцаа холбооны сайд Ч.Номин мэдээллээ.
Иймд COP-17 хурлын үеэр Монгол Улс энэ чиглэлээр ямар боломж, нөхцөл бүрдүүлж байгаагаа олон улсын хөрөнгө оруулагчдад танилцуулахаар бэлтгэж байгаа аж.
Хөрөнгө оруулалтын боломж, эрх зүйн орчныг танилцуулна
COP-17-ын үеэр манай улс AI ногоон дата төв байгуулахад шаардлагатай хөрөнгө оруулалтын боломж, хөрөнгө оруулагчдад санал болгож буй нөхцөл, мөн хууль эрх зүйн орчны талаар мэдээлэл өгөхөөр төлөвлөжээ.
Энэ хүрээнд Монгол Улсын газар зүйн байршил, цаг агаарын нөхцөл, эрчим хүчний боломж болон дата төвийн үйл ажиллагаанд тохирох давуу талуудыг олон улсын зах зээлд танилцуулах юм байна.
Өгөгдлийн тухай анхдагч хуулийг ашигтай орчин бүрдүүлэхтэй уялдуулна
Монгол Улс Өгөгдлийн тухай анхдагч хуулиа боловсруулж, түүнийг улсын газар нутгийн онцлог, цаг уурын таатай нөхцөлтэй уялдуулах замаар AI дата төвийн хөрөнгө оруулалтад таатай орчин бүрдүүлэхээр зорьж байна.
Ингэснээр Монгол Улс олон улсын AI технологийн талбарт зөвхөн хэрэглэгч бус, бодит тоглогчийн хувиар орж ирэх боломжтой гэж үзэж байгаа аж.
AI технологийг төрийн үйлчилгээ, салбаруудад нэвтрүүлэхээр ажиллана
Дотоодын салбар хоорондын уялдааг хангах зорилгоор Хиймэл оюун ухааны үндэсний зөвлөлийг байгуулахаар болжээ. Уг зөвлөлийг Ерөнхий сайд ахлах юм байна.
Зөвлөл нь төрийн үйлчилгээг иргэдэд AI-д суурилсан хэлбэрээр илүү ойр, хүртээмжтэй хүргэхэд анхаарах аж. Мөн боловсрол, эрүүл мэнд зэрэг чухал салбаруудад хиймэл оюун ухааны шийдлүүдийг нэвтрүүлэх чиглэлээр ажиллахаар төлөвлөжээ.
Монгол AI салбарт шинэ боломж нээхээр бэлтгэж байна
AI ногоон дата төв байгуулах санаачилга нь Монгол Улсын цахим хөгжил, технологийн бодлогын дараагийн том алхам болох төлөвтэй байна.
Хэрэв олон улсын хөрөнгө оруулалт татаж, эрх зүйн болон дэд бүтцийн нөхцөлөө зөв бүрдүүлж чадвал Монгол Улс хиймэл оюун ухааны дэд бүтцийн бүс нутгийн шинэ төв болох боломжтой гэж үзэж байна.
