Монгол, Хятадын сэтгүүлчдийн хамтарсан сурвалжлагын баг Бээжин хотод байрлах нано технологид суурилсан өндөр нарийвчлалтай автоматжуулалтын систем хөгжүүлэгч компанийн үйл ажиллагаатай танилцжээ.
Нано түвшний автоматжуулалтын систем хөгжүүлж байна
Бээжин хотод байрладаг тус компани нь дулаан, гэрэл, цахилгаан, соронзон орон зэрэг физикийн олон төрлийн технологийг нэгтгэсэн орчин үеийн шинжлэх ухааны шийдэлд тулгуурлан нано түвшний автоматжуулалтын систем боловсруулдаг байна.
Ялангуяа хүнд, нарийн төвөгтэй орчинд нано хэмжээний хөдөлгөөнийг бүрэн хянах шийдэл нэвтрүүлэхэд гол үйл ажиллагаагаа чиглүүлжээ.
Атомын түвшинд хүрэх нарийвчлалтай хөдөлгөөний платформ
Компанийн гол бүтээгдэхүүн нь нано түвшний өндөр нарийвчлалтай хөдөлгөөний платформ юм. Энэхүү төхөөрөмжийн нэг удаагийн хөдөлгөөний нарийвчлал нь нанометрийн хэмжээнд хүрэх бөгөөд зарим тохиолдолд атомын түвшинд ажиллах боломжтой аж.
Ийм технологи ашигласнаар атомын хэмжээнд хүртэл нарийвчилсан хяналт хийх нөхцөл бүрдэж байгаа нь өндөр технологийн үйлдвэрлэл, судалгаа, эмнэлгийн салбарт чухал ач холбогдолтой байна.
Эмнэлэг, оптик, лазер, үйлдвэрлэлийн салбарт ашиглаж байна
Тус компанийн хөгжүүлсэн технологийг олон салбарт өргөн ашиглаж байгаа аж. Үүнд:
- эмнэлгийн мэс заслын робот;
- өндөр нарийвчлалтай оптик систем;
- лазерийн чиглүүлэгч;
- дээд зэрэглэлийн үйлдвэрлэл;
- материал боловсруулах технологи;
- өндөр нарийвчлал шаардсан судалгааны орчин багтаж байна.
Нано түвшний хөдөлгөөний хяналт шаарддаг бүхий л нөхцөлд тус компанийн бүтээгдэхүүнүүд хэрэглэгдэх боломжтой гэж танилцуулжээ.
Чичирхийллийг 5 нанометрийн түвшинд хянах систем бүтээжээ
Компанийн нано технологид суурилсан бүтээгдэхүүнүүдийн дунд өндөр нарийвчлалтай хөдөлгөөн хэмжигч, гэрлийн долгионыг 4К хүртэл бууруулах боломжтой технологи, чичирхийллийг 5 нанометрийн түвшинд хянах систем зэрэг багтдаг байна.
Эдгээр шийдэл нь бичил хөдөлгөөн, орон зайн маш бага өөрчлөлтийг хэмжих, тогтворжуулах, удирдах боломжийг бүрдүүлдэг ажээ.
200 гаруй стандарт бүтээгдэхүүн үйлдвэрлэж байна
Одоогоор тус компани нано хөдөлгөөний чиглэлээр 200 гаруй стандарт бүтээгдэхүүн үйлдвэрлэж байгаа бөгөөд бүтээгдэхүүнийх нь 90 гаруй хувь бодит хэрэглээнд нэвтэрсэн байна.
Мөн судалгаа, хөгжүүлэлтийн хүрээнд “Супер нарийвчлалтай хөдөлгөөн судалгааны лаборатори” ажиллуулж, шинжлэх ухааны туршилт, шинэ технологийн туршилтуудыг тогтмол хийдэг ажээ.
Өндөр нарийвчлалтай нано технологийн бүтээгдэхүүнүүд нь эмнэлгийн тоног төхөөрөмж, хагас дамжуулагчийн үйлдвэрлэл зэрэг стратегийн ач холбогдолтой салбарт өргөн ашиглагдаж байна.
Нүдний нарийн судсыг оёх роботыг эмнэлэгт нэвтрүүлжээ
Тус компани эрүүл мэндийн салбарт нүдний 0.2 миллиметрийн нарийн судсыг өндөр нарийвчлалтай оёх боломжтой робот нэвтрүүлсэн байна.
Энэхүү робот нь нүдний мэс заслын эмчийн туслах байдлаар ашиглагдаж байгаа бөгөөд хүний гарын хөдөлгөөнөөс илүү тогтвортой, нарийн ажиллагаа гүйцэтгэх чадвартайгаараа онцлог юм.
Ийм шийдэл нь нүдний нарийн мэс засалд хүний гарын чичирхийлэл, хөдөлгөөний алдааг багасгаж, илүү тогтвортой ажиллагаа хийх боломж олгож байна.
Эрүүл мэндийн салбарт 100 гаруй бүтээгдэхүүн нэвтрүүлсэн
Эрүүл мэндийн салбарт ашиглах зориулалттай нано технологид суурилсан 100 гаруй бүтээгдэхүүнийг тус компани зах зээлд гаргаад байна.
2015 онд 13 хүний бүрэлдэхүүнтэй байгуулагдсан тус компани өдгөө 200 гаруй ажилтантай болж өргөжжээ. Тэдний 90 орчим нь доктор, магистрын зэрэгтэй судлаачид байна.
“Хамгийн жижиг биетийг бүтээж, судалдаг”
Компанийн танилцуулгын үеэр үйл ажиллагааныхаа онцлогийг дараах байдлаар тодорхойлжээ.
“Бид хамгийн жижиг биетийг бүтээж, судалдаг. Үйл хөдлөл, орон байршлын маш бага хэмжигдэхүүнийг нарийн тодорхойлох бүтээгдэхүүн хөгжүүлдэг”
Мөн 2021-2025 онд компанийн орлого 11 дахин өссөн байна. Тус компанийн бүтээгдэхүүнүүд нь микроскопоор ч харахад хүндрэлтэй бичил биет, хөдөлгөөнийг өндөр нарийвчлалтай хэмжих боломж олгодгоороо ялгарч байна.
Нано технологи эмнэлгийн ирээдүйг өөрчилж байна
Бээжингийн тус компанийн хөгжүүлж буй нано түвшний автоматжуулалт нь зөвхөн үйлдвэрлэл, судалгааны салбарт бус, хүний эрүүл мэндийн нарийн мэс засалд бодитоор нэвтэрч эхэлжээ.
Нүдний 0.2 мм судсыг роботын тусламжтай оёх технологи нь ирээдүйд өндөр эрсдэлтэй, маш нарийн ажиллагаа шаарддаг мэс заслын чиглэлд шинэ боломж нээж байна.
