Европын баруун өмнөд нутгийг дайрсан аагим халууны улмаас Испани, Франц улсуудад агаарын хэм 40°C давж, хэдэн мянган га талбайг бүрхсэн ойн түймэр дэгдээд байна. Нөхцөл байдал хүндэрсэнтэй холбогдуулан олон мянган иргэн болон жуулчдыг яаралтай нүүлгэн шилжүүлж байгаа бол Ази тивд, тухайлбал Японд хэт халалтын улмаас эмнэлгийн тусламжийн дуудлага түүхэн дээд хэмжээндээ хүрснийг Reuters агентлаг мэдээллээ.
Франц, Испанид ойн түймэр гаарч, 10 мянга гаруй хүнийг нүүлгэн шилжүүлэв
Европ тивд энэ онд түймэрт шатсан газрын хэмжээ сүүлийн 20 жилийн дунджаас хэдийнээ давсан бөгөөд одоогийн байдлаар завсарлагагүй үргэлжлэх гурав дахь халууны давлагаадаа өртөөд байна.
Бүс нутгуудын нөхцөл байдлыг багцалбал:
- Испани улс: Каталони болон Андалуси мужид түймрийн эрсдэлтэй бүсийн иргэдийг яаралтай нүүлгэн шилжүүлсэн бөгөөд Иргэний хамгаалалтын газраас аюулын түвшинг “нэн аюултай” хэмээн зарлаад байна.
- Франц улс: Бордо хотоос баруун тийш болон Аркашоны булангийн бүсэд 2,000 га газрыг хамарсан түймэр хурдацтай тархаж байна. Шөнийн турш 10 мянга гаруй хүнийг (дийлэнх нь кемпэд байрлаж байсан жуулчид) аюулгүй бүс рүү нүүлгэн шилжүүлжээ. Одоогоор 500 гаруй гал сөнөөгч ажиллаж байгаа бөгөөд амь нас, эрүүл мэндээр хохирсон тохиолдол бүртгэгдээгүй байна.
Японд наранд цохиулсан иргэдийн тоо огцом нэмэгдэв
Нөгөө талд Японы нийслэл Токио хотод наранд цохиулсан байж болзошгүй 261 хүн эмнэлэгт яаралтай хүргэгджээ.
Хэт халалтын улмаас аврах албаныхан ганцхан хоногийн дотор 3,454 дуудлага хүлээн авсан байна. Энэ нь тус улс 1963 онд түргэн тусламжийн статистик мэдээллийг бүртгэж эхэлснээс хойших нэг өдөрт хүлээн авсан хамгийн өндөр үзүүлэлт боллоо.
