Экстрим спортын олон улсын наадам Улаанбаатарт болно
Монгол Улсын Засгийн газраас 2023-2028 оныг “Монголд зочлох жил” болгон зарласан. Энэ хүрээнд эх орноо олон улсад сурталчлах, аялал жуулчлал, соёл, спортын арга хэмжээг өргөжүүлэх зорилгоор олон төрлийн өдөрлөг, фестиваль зохион байгуулж байна.
Эдгээр арга хэмжээний нэг болох экстрим спорт сонирхогчдын “Power expo & festival-2026” олон улсын наадам энэ сарын 8-10-нд Улаанбаатар хотноо болно.
Наадам “Power Land” талбайд зохион байгуулагдана
14 дэх удаагийн “Power expo & festival-2026” наадмыг 22-ын товчооны Авто худалдааны цогцолбор төвийн “Power Land” талбайд зохион байгуулахаар товложээ.
Энэхүү фестиваль нь автомашин, мото спорт, экстрим үзүүлбэр, шоу хөтөлбөрийг нэг дор багтаадгаараа онцлог бөгөөд жил бүр спорт, авто сонирхогчдын анхаарлыг татдаг томоохон арга хэмжээний нэг юм.
Монголын фестиваль Азийн шилдгээр шалгарч байжээ
“Power expo & festival” нь 2026 оны нэгдүгээр сард Тайландын нийслэл Бангкок хотноо болсон Азийн авто машины шилдгүүдийг тодруулдаг тав дахь удаагийн шагнал гардуулах ёслолоос “Азийн мото спортын шилдэг үйл ажиллагаа” шагналыг хүртсэн байна.
Энэ нь Монгол Улсаас уг шагналыг анх удаа авсан тохиолдол бөгөөд тус фестивалийн олон улсын үнэлэмж нэмэгдсэнийг харуулж байна.
10 орны баг, тамирчид оролцоно
Энэ жилийн 14 дэх удаагийн наадамд нийт 10 орны баг, тамирчид хүрэлцэн ирж оролцохоор болжээ. Ингэснээр “Power expo & festival-2026” нь зөвхөн дотоодын авто, мото спортын арга хэмжээ бус, олон улсын хэмжээний өрсөлдөөн, үзүүлбэрийн талбар болох юм.
Мөн өнгөрсөн жилээс фестивалийн нэг хэсэг болгон зохион байгуулж эхэлсэн “Racing TOP Model Asia” олон улсын моделийн шалгаруулалтыг энэ жил илүү өргөн хүрээнд явуулахаар төлөвлөсөн байна.
“Racing TOP Model Asia” илүү өргөн хүрээтэй болно
Зохион байгуулагчдын мэдээлснээр, энэ жилийн “Racing TOP Model Asia” уралдаанд гадаадын 3-5 орноос өндөр зэрэглэлийн моделиуд албан ёсоор оролцоно.
Тэд монгол моделиудтай нэгэн тайзнаа өрсөлдөж, фестивалийн шоу, загвар, авто соёлын өнгө төрхийг улам баяжуулах аж.
Фестивалийн үеэр 16 төрлийн тэмцээн, шоу болно
“Power expo & festival-2026”-ийн хүрээнд автомашин, мото спорт, экстрим үзүүлбэр, тулаан, худалдаа, шоу хөтөлбөрийг нэг дор багтаасан 16 төрлийн тэмцээн, арга хэмжээ зохион байгуулахаар төлөвлөжээ.
Тэдгээрээс онцолбол:
- Олон улсын дрифт шоу
- Автомашины ёслолын жагсаал
- Холимог тулаан
- Автомашины худалдаа
- Автобусны ур чадварын тэмцээн
- Экстрим үзүүлбэрүүд
- Авто, мото спортын төрөл бүрийн уралдаан
- Загварын шоу, моделийн шалгаруулалт
Монголын авто спортын хамгийн сонирхолтой арга хэмжээнүүдийн нэг
“Power expo & festival-2026” нь хурд, хүч, ур чадвар, загвар, энтертайнмент хосолсон олон улсын наадам гэдгээрээ онцлог. Энэ удаагийн фестиваль 10 орны баг, тамирчдыг нэгтгэж, Улаанбаатар хотыг экстрим спорт, авто сонирхогчдын төв болгох төлөвтэй байна.
