Хятад улс усан доорх төмөр замын шинэ том төслөө дуусгав
Хятад улсад Шар мөрний доогуур дайран өнгөрөх, 14 километрээс урт өндөр хурдны төмөр замын туннелийн үндсэн бүтээн байгуулалт дуусжээ.
Тус улс төмөр замын сүлжээгээ тэлэх хүрээнд газар доорх туннелийн шийдлийг улам идэвхтэй ашиглаж байгаа бөгөөд энэ удаагийн бүтээн байгуулалт нь онцгой анхаарал татаж байна. Хятадын төв телевизийн мэдээлснээр, улсынхаа хамгийн том мөрний доогуур гарч буй энэхүү туннель нь Шанхайн Чунмин арлыг Жянсу мужийн Тайцан хоттой холбох аж.
Төслийг энэ оны эцэс гэхэд бүрэн дуусгана
Албаныхны мэдээлснээр уг төслийн бүх ажлыг энэ оны төгсгөл гэхэд бүрэн дуусгахаар төлөвлөжээ.
Шинэ төмөр замын шугам дээр галт тэрэг цагт 350 километр хүртэл хурдлах боломжтой байна. Ингэснээр холбогдож буй хотуудын хоорондын зорчих хугацаа мэдэгдэхүйц багасаж, тээврийн урсгал илүү хурдан, үр ашигтай болох хүлээлттэй байгаа юм.
Хятад дэд бүтцийн шинэ дээд амжилтуудаа үргэлжлүүлсээр байна
Хятад улс сүүлийн жилүүдэд томоохон туннель, авто зам, төмөр замын төслүүдийг эрчимтэй хэрэгжүүлж байгаа. Үүний өмнө Шинжаан-Уйгурын өөртөө засах оронд дэлхий дээрх хамгийн урт хурдны замын туннельд тооцогдох 22.13 километр урт “Тяньшань Шэнли” туннелийг албан ёсоор ашиглалтад оруулж, хөдөлгөөнийг нээсэн талаар мэдээлж байсан юм.
Шинэ туннель бүс нутгийн тээврийн зураглалыг өөрчилж мэднэ
Шар мөрний доогуур барьсан энэ төмөр замын туннель нь зөвхөн инженерийн томоохон бүтээн байгуулалт төдийгүй, бүс нутгийн тээвэр, логистикийн шинэ боломжийг нээх чухал төсөл гэж үнэлэгдэж байна. Ялангуяа өндөр хурдны төмөр замын сүлжээг улам нягтаршуулах замаар Хятад улс стратегийн холбоосуудаа илүү хүчтэй болгох зорилгоо үргэлжлүүлж байна.
