Загварын ертөнцийн домогт кино 20 жилийн дараа эргэн ирэв
Анхны ангиараа үзэгчдийн сэтгэлд хоногшсон “The Devil Wears Prada” киноны үргэлжлэл болох “The Devil Wears Prada 2” Умард Америкийн кино театрын зах зээлд хүчтэй эхлэл хийлээ. Нээлтийн амралтын өдрүүдэд тус кино хамгийн өндөр орлого олж, box office-ийн жагсаалтыг тэргүүлсэн байна.
Exhibitor Relations компанийн мэдээлснээр, “The Devil Wears Prada 2” АНУ болон Канадын кино театруудаас нийт 77 сая ам.долларын орлого бүрдүүлжээ. Ийнхүү 20 жилийн өмнөх алдарт бүтээлийн үргэлжлэл үзэгчдийн сонирхлыг хэвээр хадгалж байгааг харууллаа.
Шинэ ангид Anne Hathaway-ийн бүтээсэн гол дүр дахин Miranda Priestly-ийн ертөнцөд хөл тавина. Meryl Streep-ийн амилуулсан хатуу, сүр хүчтэй сэтгүүлийн эрхлэгч Miranda Priestly энэ удаа зах зээлийн хүнд нөхцөлд орсон загварын сэтгүүлээ авч үлдэхийн тулд тэмцэх бөгөөд тэд хамтран ажиллахаас өөр сонголтгүй болно.
Анхны кинонд үзэгчдийн танил болсон Stanley Tucci, Emily Blunt нар ч мөн дүрүүдээрээ эргэн ирсэн байна. Үүнээс гадна шинэ бүтээлд Холливудын A зэрэглэлийн жүжигчид болон алдартнууд туслах дүрээр оролцсон нь киноны хүлээлтийг улам нэмэгдүүлжээ.
“Michael” кино хоёрдугаар байрт бичигдэв
Miranda Priestly-ийн дүрийг “Vogue” сэтгүүлийн домогт эрхлэгч Anna Wintour-оос санаа аван бүтээсэн гэж үздэг. Meryl Streep анхны “The Devil Wears Prada” киногоороо Golden Globe шагнал хүртэж, мөн Oscar-ийн шилдэг туслах дүрийн төрөлд нэр дэвшиж байсан юм.
Өнгөрсөн долоо хоногт Умард Америкийн box office-ийг Michael Jackson-ы намтраас сэдэвлэсэн “Michael” кино тэргүүлж байв. Тус бүтээл нээлтийн эхний долоо хоногтоо 97 сая ам.долларын орлого олсон ч энэ удаа 54 сая ам.долларын орлогоор хоёрдугаар байр руу ухарчээ.
Гуравдугаар байранд “The Super Mario Galaxy Movie” 12.1 сая ам.долларын орлогоор жагссан байна. Уг хүүхэлдэйн киноны нийт хуримтлагдсан орлого аль хэдийн 400 сая ам.долларын босгыг давжээ.
“The Devil Wears Prada 2”-ын хүчтэй эхлэл нь загвар, карьер, эрх мэдэл, Холливудын оддын бүрэлдэхүүнтэй энэ түүх үзэгчдийн дунд одоо ч өндөр хүлээлттэй хэвээр байгааг баталж байна.
