АНУ-ын энх тайвны саналд Иран хариу өгчээ
АНУ-ын Ерөнхийлөгч Дональд Трамп энх тайвны хэлэлцээ хийх саналд нь Ираны талаас ирүүлсэн хариуг хүлээн авах боломжгүй гэж мэдэгджээ.
Тэрээр олон нийтийн сүлжээндээ Ираны талаас ирсэн хариуг дөнгөж сая уншсан тухайгаа бичээд, уг байр суурь нь түүнд огт нийцэхгүй байгааг илэрхийлсэн байна. Трамп дэлгэрэнгүй тайлбар өгөөгүй ч Ираны хариуг “огт хүлээн зөвшөөрөх боломжгүй” гэж тодорхойлжээ.
Хариуг Пакистанаар дамжуулан илгээсэн байна
Трамп өмнө нь Ираны тал баасан гараг гэхэд хариугаа өгнө гэж найдаж буйгаа мэдэгдэж байсан. Харин Ираны тал эцсийн хугацаа, тулган шаардалтад санаа зовохгүй гэдгээ илэрхийлж байжээ.
Ираны төрийн мэдээллийн агентлагийн мэдээлснээр, тус улсын эрх баригчид зуучлагчийн үүрэг гүйцэтгэж буй Пакистан улсад хариугаа илгээсэн байна.
Ираны төрийн телевиз болон бусад хэвлэлүүдийн мэдээлснээр, хариу саналд фронтын бүх шугамын дагуу мөргөлдөөнийг зогсоох, ялангуяа Ливан дахь дайныг зогсоох, мөн далайн тээврийн аюулгүй байдлыг хангах асуудлууд багтжээ.
АНУ-ын сайд тодорхой байр суурь хэлсэнгүй
CBS телевизийн сэтгүүлч АНУ-ын Эрчим хүчний сайд Крис Райт-аас Иранаас ирүүлсэн хариуны талаар асуухад тэрээр нөхцөл байдлыг тодорхой тайлбарлахаас зайлсхийсэн байна.
Крис Райт “Энэ бүхэн хаана хүрээд дуусахыг бид мэдэж байгаа боловч биднийг тэнд хүргэх замыг хараахан мэдэхгүй байна” гэж хэлжээ.
Персийн буланд хурцадмал байдал үргэлжилж байна
Дипломат санал солилцоо үргэлжилж байгаа ч Персийн булангийн бүсэд нөхцөл байдал тайван болоогүй байна.
Ням гарагт Арабын Нэгдсэн Эмират Улсын Батлан хамгаалах яам Иранаас хөөргөсөн хоёр нисгэгчгүй аппаратыг агаарын довтолгооноос хамгаалах хүчин амдан сөнөөсөн гэж мэдээлжээ.
Мөн Кувейтын Батлан хамгаалах яамны төлөөлөгчийн мэдээлснээр, ням гаргийн үүрээр тус улсын агаарын орон зайд дайсагнасан хэд хэдэн дрон илэрсэн бөгөөд тогтоосон журмын дагуу арга хэмжээ авсан байна.
Хэлэлцээний цаашдын явц тодорхойгүй хэвээр байна
Трамп Ираны хариуг хүлээн зөвшөөрөх боломжгүй гэж мэдэгдсэн нь хоёр улсын хоорондын хэлэлцээний ирээдүйг улам тодорхойгүй болгож байна.
Вашингтон цаашид ямар алхам хийх, Ираны тал шинэ санал ирүүлэх эсэх нь одоогоор тодорхойгүй байна. Персийн булан дахь дронтой холбоотой мэдээллүүд бүс нутгийн аюулгүй байдлын эрсдэл хэвээр байгааг харуулж байна.
