Кюүшюү бүсэд хүчтэй чичиргээ бүртгэгдэв
2026 оны долдугаар сарын 28-ны Мягмар гарагийн 16:27 цагт Япон Улсын Кюүшюү бүсийн Күмамото мужид 7.1 магнитудын хүчтэй газар хөдлөлт болжээ. Тус мужийн Үки хот болон Хикава тосгонд Японы газар хөдлөлтийн хэмжүүрээр хамгийн өндөр түвшин болох долоон баллын чичиргээ бүртгэгдсэн байна.
Газар хөдлөлтийн улмаас Күмамото мужийн зарим хэсэгт барилга байгууламж эвдэрч, гал түймэр гарсан талаар мэдээлэгдэв. Мөн нэгэн худалдааны төвд олон хүн гацсан байж болзошгүй тухай мэдээлэл гарчээ.
Зам тээвэр, холбоо харилцаанд доголдол үүсжээ
Гамшгийн дараа тухайн бүс нутагт хурдан галт тэрэг, төмөр зам, авто зам болон нисэх буудлын үйл ажиллагаа тасалдсан байна. Зарим газарт цахилгаан, холбоо харилцааны системд доголдол гарсан талаар мөн мэдээлэгдэж байна.
Эрх бүхий байгууллагууд хохирлын хэмжээг тогтоох, иргэдийг аврах, дэд бүтцийн хэвийн ажиллагааг сэргээх чиглэлээр ажиллаж байгаа аж.
Цүнамигийн сэрэмжлүүлгийг цуцалсан байна
Газар хөдлөлтийн дараа Ариакэ тэнгис болон Яцүширо тэнгист нэг метр хүртэл өндөртэй цүнами үүсэх эрсдэлтэй гэж үзэн сэрэмжлүүлэг гаргасан байна.
Гэвч далайн түвшний өөрчлөлтийг ажигласны дараа тухайн сэрэмжлүүлгийг 18:10 цагт цуцалжээ. Гэсэн ч иргэдийг эргийн бүс орчимд анхаарал болгоомжтой байхыг зөвлөж байна.
Давтан чичиргээ үргэлжилж болзошгүй
Күмамото мужид 17:08 болон 19:03 цагийн орчимд дахин таван баллын хүчтэй газар хөдлөлт бүртгэгдсэн нь газар хөдлөлтийн идэвхжил үргэлжилж буйг харуулж байна.
Японы Цаг уурын агентлаг болон холбогдох байгууллагууд ойрын 2-3 хоногт хүчтэй давтан газар хөдлөлт болох эрсдэл өндөр байгааг анхааруулжээ. Иймээс иргэдийг албан ёсны мэдээллийг тогтмол авч, зааварчилгааг дагахыг сануулж байна.
Монгол иргэдэд анхааруулга хүргэв
Япон Улсад, ялангуяа Күмамото болон Кюүшюү бүсэд ажиллаж, амьдарч буй Монгол Улсын иргэдийг Японы эрх бүхий байгууллагын сэрэмжлүүлэг, зааварчилгааг чанд мөрдөхийг анхааруулжээ.
Нурж болзошгүй барилга байгууламж, уулын энгэр, гол мөрөн, далайн эргийн бүсээс хол байхыг зөвлөсөн байна. Мөн онц шаардлагагүй тохиолдолд гамшигт өртсөн бүс рүү зорчихгүй байхыг санууллаа.
Яаралтай хэрэгцээний зүйлсээ бэлдэхийг зөвлөв
Иргэд гар утсаа цэнэгтэй байлгаж, ундны ус, хүнс, эм, гэрэлтүүлэг зэрэг зайлшгүй шаардлагатай зүйлсээ бэлдэх шаардлагатайг анхааруулж байна.
Шаардлагатай нөхцөлд орон нутгийн захиргааны зааврын дагуу нүүлгэн шилжүүлэх байранд очиж байрлахыг зөвлөжээ.
Күмамотод байгаа Монгол иргэдээс хохирлын мэдээлэл ирээгүй байна
Одоогийн байдлаар Күмамото мужид Монгол Улсын 40 орчим иргэн ажиллаж, амьдарч байгаа бөгөөд тэд гамшигт өртсөн гэх мэдээлэл одоогоор ирээгүй байна.
Тус бүсэд оршин суугаа Монгол Улсын иргэд шаардлагатай тохиолдолд Элчин сайдын яамны 03-3469-2088 шуурхай утсаар холбогдон тусламж авах боломжтойг мэдэгдлээ.
