Броуд Пик ууланд болсон ослын дараа аврах баг мэдээлэл өглөө
Пакистан дахь Броуд Пик ууланд цасан нурангид өртөн амь насаа алдсан Их Британи–Балбын алдарт уулчин Нирмал Пуржагийн цогцсыг олсон талаар аврагчид мэдээлжээ.
Пакистаны Alpine Club of Pakistan байгууллагын мэдэгдэлд дурдсанаар, түүний цогцсыг далайн түвшнээс ойролцоогоор 5700 метрийн өндөрт илрүүлсэн байна. Мөн ойролцоо өөр гурван цогцос харагдсан ч хэн болохыг нь одоогоор тогтоогоогүй байгаа аж.
Elite Expeditions түүний нас барсныг зарласан
43 настай Пуржагийн амь үрэгдсэн тухай мэдээллийг түүний байгуулсан Elite Expeditions компани бямба гарагт албан ёсоор зарласан байна. Тэрээр нийт 10 хүний аминд хүрсэн цасан нурангийн хохирогчдын нэг байжээ.
Балбад төрж, хожим Их Британийн армид алба хаасан Нирмал Пуржа 2019 онд дэлхийн 8000 метрээс дээш өндөртэй 14 оргилыг зургаан сар гаруйн хугацаанд авирснаараа олон улсад нэр хүндтэй болсон юм.
Олдсон цогцсуудыг уулчдын бааз руу хүргэнэ
Alpine Club of Pakistan байгууллагын мэдээлснээр, газар дээр ажиллаж буй аврах баг олдсон цогцсуудыг Японы уулчдын бааз руу хүргэхээр ажиллаж байна.
Пуржагийн нас барсныг зарлахаас өмнө Пакистаны эрх баригчид түүний экспедицийн бүрэлдэхүүнд явсан АНУ-ын иргэн Маллори Гейс, Оманы иргэн Надира Ахмед Абдулла Аль Харти, Балбын иргэн Пур Бахадур Гурунг нарын цогцсыг олсон талаар мэдээлжээ.
Балбын Ерөнхий сайд эмгэнэл илэрхийлэв
Бямба гарагт Балбын Ерөнхий сайд Балендра Шах мэдэгдэл хийж, “Пакистаны Каракорумын нуруунд дэлхийн дээд амжилтын эзэн Нирмал Пуржа тэргүүтэй зургаан Балба иргэн болон дөрвөн гадаадын уулчин эмгэнэлтэйгээр амиа алдсан явдал биднийг гүнээ цочирдууллаа” хэмээжээ.
Тэрээр мөн “Тэдний эр зориг, үнэнч зүтгэл, оруулсан хувь нэмрийн түүх үргэлж урам зориг өгөх болно” гэж мэдэгдсэн байна.
Ах нь сэтгэл шимшрүүлсэн үг бичжээ
Пуржагийн ах Камал Пуржа эмгэнэлдээ “Хайрт дүү Нирмал ‘Нимсдай’ Пуржа болон бусад уулчид биднийг орхин одсоныг маш их уй гашуутайгаар дуулгаж байна. Бидний зүрх шархалж байгаа ч бид чамаараа үнэхээр бахархаж байна. Чиний үлдээсэн өв мөнхөд орших болно” хэмээн бичжээ.
Аврах ажиллагаанд оролцож буй Alpine Club of Pakistan байгууллагын хэвлэлийн төлөөлөгч Наила Киани BBC-ийн News hour нэвтрүүлэгт ярилцлага өгөхдөө бүх уулчин амь үрэгдсэн байх вий гэсэн болгоомжлолтой байгаагаа илэрхийлсэн байна.
Тэрээр Пуржатай олон удаа хамт авирч байсан бөгөөд түүнийг “маш туршлагатай, аймшиггүй уулчин” хэмээн тодорхойлж, манлайлах чадварыг нь онцолжээ.
14 оргилыг 189 хоногт авирсан түүхэн амжилт
Олон улсын уулчдын багийг Нирмал Пуржа ахалж байсан аж. Нимс нэрээрээ мөн алдартай тэрээр 2019 онд дэлхийн 8000 метрээс дээш өндөртэй бүх 14 оргилыг ердөө 189 хоногийн дотор авирч, өмнөх дээд амжилтыг долоогоос илүү жилээр шинэчилсэн юм.
Түүний энэ гайхамшигт аяллын тухай өгүүлсэн Netflix-ийн “14 Peaks: Nothing Is Impossible” баримтат кино хоёр жилийн дараа гарч, Пуржагийн нэр хүндийг дэлхий даяар улам өсгөсөн билээ.
Тухайн үед Пуржа “Энэ зургаан сар маш хүнд атлаа даруу байдлыг ойлгуулсан хугацаа байлаа. Хэрэв тууштай байж, өөртөө итгэж, эерэг сэтгэлгээтэй байвал юу ч боломжтой гэдгийг харуулж чадсан гэж найдаж байна” хэмээн хэлж байжээ.
Их Британийн армид 16 жил алба хаасан
Нирмал Пуржа Их Британийн армид 16 жил алба хаасан бөгөөд үүний 10 жилийг тусгай хүчний ангид өнгөрүүлсэн байна. Өндөр уулын авиралтын салбарт үзүүлсэн амжилтынхаа төлөө тэрээр 2018 онд хатан хаан II Элизабетаас Member of the Order of the British Empire одон хүртжээ.
Тэрээр Өмнөд Английн Хэмпшир мужид эхнэр, гурван настай охиныхоо хамт амьдардаг байсан бөгөөд өөрийгөө Их Британийн армид алба хааж байхдаа Эверестэд авирсан анхны Гуркха цэрэг гэж тодорхойлдог байв.
Сүүлийн бичлэгтээ Броуд Пикт авирахаар анх төлөвлөөгүй гэжээ
Пуржа X хуудсандаа даваа гарагт нийтэлсэн хамгийн сүүлийн бичлэгтээ анхандаа Броуд Пикт авирах төлөвлөгөөгүй байсан тухай дурдсан байна.
Түүний бичсэнээр, анхны зорилго нь зөвхөн G2 буюу Каракорумын нуруунд орших Гашербрум II оргилд авирах байжээ. Гэвч Пакистан руу явахаасаа өмнөхөн Броуд Пикт амжилттай авирч чадвал хүчилтөрөгчийн нэмэлт төхөөрөмж ашиглалгүйгээр 8000 метрээс дээш өндөртэй 14 оргилд хоёр удаа авирсан анхны хүн болоход ердөө нэг оргил үлдэхийг ойлгосон байна.
“Eight-thousander” буюу найман мянгатын оргил гэдэг нь далайн түвшнээс 8000 метрээс дээш өндөртэй уулыг хэлдэг.
Пуржа “Энэ төлөвлөсөн зүйл байгаагүй. Гэхдээ боломжууд чангаар дууддаггүй, харин чимээгүй хөдөлмөрлөж буй хүмүүст шивнэдэг” гэжээ.
Мөн тэрээр бичлэгийнхээ төгсгөлд “Броуд Пик, би чамаас аюулгүй өгсөж, аюулгүй буухыг л хүсэж байна. Би уулсыг хэзээ ч басамжилдаггүй” хэмээн бичсэн байв.
Броуд Пик уулчдын хамгийн хүнд сорилтын нэг
Броуд Пик нь өндөр уулын авиралтын ертөнцөд хамгийн хүнд, эрсдэлтэй сорилтуудын нэгт тооцогддог. Тус оргилд анхны амжилттай авиралтыг 1957 онд Австрийн экспедиц хийсэн байна.
Түүнээс хойш олон уулчин оргилд хүрсэн ч олон арван хүн амь насаа алдсан байдаг. Броуд Пик дээр хамгийн олон хүний амь эрсэдсэн жилүүдийн нэг нь 2013 он бөгөөд тухайн жил зургаан уулчин амь үрэгджээ.
