Алга болсон хиймэл шүдний эрэл гэнэтийн төгсгөлтэй байв
Хятадын Фужиань мужид амьдардаг нэгэн эмэгтэй гэрт нь болсон хөгжилтэй явдлыг олон нийтэд хуваалцсан нь цахим орчинд богино хугацаанд хүчтэй тархжээ. Түүний ярьснаар эмээгийнх нь хиймэл шүд гэртээ гэнэт алга болж, гэр бүлийнхэн хаана хийснийг нь хайж эхэлсэн байна.
Эрэлд зөвхөн хүмүүс ч бус, гэрийн тэжээвэр ноход нь хүртэл “нэгдсэн” аж. Тухайн айлд 007 нэртэй Самоед, 17 нэртэй Бордер колли, 3D нэртэй Далматин үүлдрийн ноход байдаг байжээ.
007 нохой шүдийг өөрийнх мэт зүүчихсэн байжээ
Гэр бүлийнхэн бүтэн өдөржин хиймэл шүдийг хайсан ч олж чадсангүй. Харин удалгүй тэд Самоед үүлдрийн 007 нохойг хараад гайхжээ. Учир нь нохой эмээгийн хиймэл шүдийг амандаа хийчихсэн, яг л инээмсэглэж байгаа мэт зогсож байсан байна.
Энэ хөгжилтэй мөчийг бичлэг болгон цахим сүлжээнд нийтэлсэн даруйд хүмүүсийн анхаарлыг татжээ. 007-ийн хиймэл шүдтэй төрх олон хүнийг инээлгэж, бичлэг нь сая сая үзэлт авч, богино хугацаанд олон улсад хүртэл тархсан байна.
Хөгжилтэй бичлэгээс мем, мемээс нөлөөлөгч болов
Анх гэр бүлийн дотоод хошин явдал мэт харагдсан энэ бичлэг удалгүй Хятадын сошиал орчинд төдийгүй гадаадын хэрэглэгчдийн дунд ч тархжээ. 007 нохойн хиймэл шүдтэй “инээмсэглэл” мем болж, хүмүүс янз бүрийн хөгжилтэй тайлбартайгаар дахин нийтэлж эхэлсэн байна.
Үүний дараа 007-ийн цахим хуудсуудын дагагчдын тоо огцом өсөж, тэрээр 17 болон 3D нэртэй бусад нохойтойгоо хамт тогтмол контент нийтэлдэг болжээ.
Нэг бичлэг нь 20-50 мянган юань хүрдэг байна
Цахим орчинд алдартай болсон 007 нохойг брэндүүд ч анзаарч эхэлсэн байна. Өдгөө тэрээр гэрийн тэжээвэр амьтдын хоол, амны хөндийн арчилгааны бүтээгдэхүүн зэрэг чиглэлийн компаниудтай хамтран ажилладаг болжээ.
Мэдээллээр, 007-ийн нэг сурталчилгааны бичлэг дунджаар 20,000-50,000 юанийн үнэлгээтэй байдаг аж. Түүнчлэн шууд дамжуулалтаар бүтээгдэхүүн танилцуулж, борлуулалтаас ашиг хүртдэг болсон байна.
Гэрийн нохойгоос цахим худалдааны од хүртэл
007-ийн түүх цахим орчинд нэг хөгжилтэй мөч хэр хурдан том боломж болж хувирч болдгийг харууллаа. Эмээгийн хиймэл шүдийг санамсаргүй зүүсэн Самоед нохой эхэндээ зөвхөн хүмүүсийг инээлгэсэн бол одоо гэрийн тэжээвэр амьтдын контентын томоохон төлөөлөгчдийн нэг болжээ.
Тэрээр 17 болон 3D нохдын хамт өөрийн гэсэн танигдсан дүр төрхтэй болж, сошиал орчин дахь өндөр хандалтаа бодит орлого болгон хувиргаж чадсан байна.
