“Gus” хэмээн нэрлэгддэг Тираннозавр үлэг гүрвэлийн араг яс АНУ-д болсон дуудлага худалдаагаар $50.1 саяын үнэ хүрч, үлэг гүрвэлийн олдворын худалдааны шинэ дээд амжилт тогтоожээ.
Sotheby’s дуудлага худалдаанд долоон худалдан авагч өрсөлджээ
Мягмар гарагт Нью-Йорк хот дахь Sotheby’s төвд болсон дуудлага худалдааны үеэр “Gus” нэртэй “Tyrannosaurus rex” үлэг гүрвэлийн араг ясыг нэрээ нууцалсан худалдан авагч $50.1 саяар авсан байна.
Дуудлага худалдаанд нийт долоон худалдан авагч оролцож, ойролцоогоор 10 минутын турш ширүүн өрсөлдсөний эцэст уг үнэ тогтжээ. Ингэснээр үлэг гүрвэлийн ясны дуудлага худалдаанд өмнө нь бүртгэгдэж байгаагүй хамгийн өндөр ханш бий болсон байна.
“Gus” 2021 онд Өмнөд Дакотагаас олдсон
“Gus” нь 2021 онд АНУ-ын Өмнөд Дакота мужийн үхрийн фермээс илэрсэн олдвор юм. Нийт 183 хэсгээс бүрдэх энэ араг яс нь өнөөдрийг хүртэл олдсон “Tyrannosaurus rex”-ийн хамгийн бүрэн бүтэн олдворуудын нэгт тооцогдож байна.
Судлаачдын үзэж буйгаар, энэхүү аварга махчин үлэг гүрвэл одоогоос 72-66 сая жилийн өмнө, дэлхий дээр харьцангуй зөөлөн дулаан уур амьсгал давамгайлж байсан үед амьдарч байжээ.
11.6 метр урт аварга олдвор
“Gus” араг ясны урт 11.6 метр бөгөөд өнөөдрийг хүртэл илэрсэн Тираннозаврын хамгийн том араг яснуудын нэг гэж үнэлэгдэж байна.
Мөн уг олдвор нь Тираннозаврын нийт ясны бүтцийн 63 орчим хувийг бүрдүүлдэг аж. Энэ нь түүнийг шинжлэх ухаан болон цуглуулгын зах зээлд онцгой үнэ цэнтэй болгожээ.
Ховор олдвор хувь хүний өмчид шилжих нь маргаан дагуулж байна
Сүүлийн жилүүдэд үлэг гүрвэлийн араг яс, ховор чулуужсан олдворуудын үнэ эрс өсөж байгаа. Үүний зэрэгцээ зарим палеонтологичид ийм чухал олдворууд музей, судалгааны байгууллага бус, хувийн цуглуулагчдын гарт очиж байгааг шүүмжилж байна.
Sotheby’s төвийн шинжлэх ухаан, байгалийн түүхийн тасгийн тэргүүн Кассандра Хаттон дуудлага худалдаа эхлэхээс өмнө АНУ-ын хууль эрх зүйн онцлогийг тайлбарлажээ.
“АНУ бол ийм төрлийн олдворыг хувийн өмчид тооцдог дэлхийн цорын ганц улс юм. Хэрвээ та газрыг нь эзэмшдэг бол тэндээс илэрсэн олдворыг эзэмших, зарах эрхтэй. Тиймээс үлэг гүрвэлийн ясыг өмчлөх хүсэлтэй хүмүүст боломж олгодог цорын ганц газар АНУ юм” гэж Sotheby’s төвийн шинжлэх ухаан, байгалийн түүхийн тасгийн тэргүүн Кассандра Хаттон дуудлага худалдаа эхлэхээс өмнө тайлбарлажээ.
Өмнөх дээд амжилтыг “Apex” тогтоож байв
“Gus”-ээс өмнө үлэг гүрвэлийн араг яс хамгийн өндөр үнэ хүрсэн тохиолдол нь 2024 онд бүртгэгдсэн “Apex” нэртэй Стегозаврын араг ясны худалдаа байжээ.
Тухайн үед хувийн хөрөнгө оруулалтын сангийн тэрбумтан Кен Гриффин “Apex”-ийг $44.6 саяар худалдан авч байсан юм.
Харин “Gus” $50.1 саяар зарагдсанаар зөвхөн үнэ ханшаараа бус, үлэг гүрвэлийн олдворын зах зээл хэр хурдтай өсөж буйг харуулсан шинэ түүхэн наймаа боллоо.
