И Жэ Мёны 15 жилийн дараах төрийн айлчлал Монголд эхэллээ

Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Солонгос Улсын Ерөнхийлөгч И Жэ Мён, тэргүүн хатагтай Ким Хе Гён-ы хамт Монгол Улсад төрийн айлчлал хийхээр хүрэлцэн ирлээ.

Хүндэт зочдыг албаныхан угтан авав

БНСУ-ын Ерөнхийлөгч И Жэ Мён болон тэргүүн хатагтай Ким Хе Гён нарыг Гадаад харилцааны сайд Б.Батцэцэг, Монгол Улсаас БНСУ-д суугаа Онц бөгөөд Бүрэн эрхт Элчин сайд С.Сүхболд, БНСУ-аас Монгол Улсад суугаа Элчин сайд Чой Жин Вон нар угтан авсан байна.

Энэхүү айлчлал нь БНСУ-ын төрийн тэргүүн 2011 онд Монгол Улсад айлчилснаас хойш 15 жилийн дараа болж буйгаараа онцлог юм.

Ерөнхийлөгч нар албан ёсны хэлэлцээ хийнэ

Айлчлалын үеэр Монгол Улсын Ерөнхийлөгч У.Хүрэлсүх, БНСУ-ын Ерөнхийлөгч И Жэ Мён нар албан ёсны хэлэлцээ хийхээр төлөвлөжээ.

Хэлэлцээний хүрээнд хоёр улсын “Стратегийн түншлэл”-ийн харилцааг өргөжүүлэн бэхжүүлэх, хамтын ажиллагааг эдийн засгийн агуулгаар баяжуулах, мөн олон улс болон бүс нутгийн тавцан дахь хамтын ажиллагааны талаар санал солилцох юм.

Баримт бичгүүдэд гарын үсэг зурна

Төрийн айлчлалын хүрээнд талууд хоёр улсын харилцаа, хамтын ажиллагааг цаашид өргөжүүлэн хөгжүүлэхтэй холбоотой Засгийн газар болон байгууллага хоорондын баримт бичгүүдэд гарын үсэг зурахаар төлөвлөсөн байна.

Эдгээр баримт бичиг нь Монгол, БНСУ-ын стратегийн түншлэлийн харилцааг бодит агуулгаар баяжуулах, эдийн засаг, хөрөнгө оруулалт, бүс нутгийн хамтын ажиллагааг идэвхжүүлэхэд чиглэх төлөвтэй байна.

Наадмын нээлтэд хүндэт зочноор оролцоно

БНСУ-ын Ерөнхийлөгч И Жэ Мён, гэргий Ким Хе Гён нар Монгол Улсад хийх айлчлалынхаа үеэр Үндэсний их баяр наадмын нээлтийн ёслолд хүндэт зочдын хувиар оролцох юм.

Ингэснээр хоёр улсын дээд түвшний айлчлал Монголын үндэсний баяр наадмын өдрүүдтэй давхцаж, соёл, уламжлалыг танилцуулах чухал боломж болж байна.

Монгол, БНСУ-ын харилцааны үе шат

Монгол Улс, Бүгд Найрамдах Солонгос Улс 1990 оны гуравдугаар сарын 26-нд дипломат харилцаа тогтоосон.

Үүнээс хойш хоёр улс харилцаагаа шат дараатай ахиулж ирсэн юм.

• 2006 онд “Сайн хөршийн, найрамдал, хамтын ажиллагааны түншлэл”;
• 2011 онд “Иж бүрэн түншлэл”;
• 2021 онд “Стратегийн түншлэл”-ийн харилцаа тогтоосон.

БНСУ 1990 онд Улаанбаатар хотод Элчин сайдын яамаа нээсэн бол Монгол Улс 1991 онд Сөүл хотод Элчин сайдын яамаа байгуулжээ.

И Жэ Мёны намтар

БНСУ-ын Ерөнхийлөгч И Жэ Мён нь улс төр, орон нутгийн удирдлага, иргэний нийгмийн салбарт олон жил ажилласан туршлагатай.

Тэрээр:

• 1990-1994 онд Кёнги аймгийн Ичон хотын Хөдөлмөрийн зөвлөгөөний төв, Гванжү хотын Хөдөлмөрийн зөвлөгөөний төвийн захирал;
• 1994-2005 онд Кёнги аймгийн Соннам хотын “Ард иргэдийн эв нэгдэл” ТББ-ын гүйцэтгэх захирал, Соннам хотын Авлигын эсрэг иргэний нийгмийн байгууллагын захирал;
• 2010-2018 онд Соннам хотын дарга;
• 2018-2021 онд Кёнги аймгийн Засаг дарга;
• 2022-2024 онд Үндэсний Ассамблейн гишүүн;
• 2022-2025 онд Ардчилсан намын дарга;
• 2024-2025 онд Үндэсний Ассамблейн гишүүнээр тус тус ажиллажээ.

Тэрээр 2025 онд БНСУ-ын Ерөнхийлөгчөөр сонгогдсон байна.

Ийнхүү БНСУ-ын Ерөнхийлөгч И Жэ Мёны Монгол Улсад хийж буй төрийн айлчлал хоёр улсын стратегийн түншлэлийн харилцааг шинэ шатанд гаргах чухал үйл явдал болж байна.