“Алтан бөмбөг”-ийн 8 удаагийн эзэн, Аргентины довтлогч Лионель Месси Испанийн хоёрдугаар дивизионд (Сегунда) тоглодог “Эльденсе” хөлбөмбөгийн клубийг худалдан авах зарчмын тохиролцоонд хүрсэн тухай “Marca” болон “AS” хэвлэлүүд мэдээллээ. Эх сурвалжуудын мэдээлснээр аргентин залуу тус клубийн хувьцааг 100 хувь худалдаж авахаар төлөвлөж байгаа аж.
“Эльденсе” ба Мессигийн цаашдын төлөвлөгөө
“Эльденсе” клуб нь Аликанте мужийн Эльда хотод байрладаг бөгөөд Месси “Интер Майами” дахь карьераа дуусгасныхаа дараа тус хотод суурьшихаар төлөвлөж байгааг “Marca” онцолжээ. Хэлцэл одоо сүүлчийн шатандаа явж байгаа бөгөөд талууд хууль зүйн процедурыг эцэслэн хийж байна.
Өмнө нь 4 дүгээр сард Месси Барселона мужийн Баш-Льобрегат дахь Каталоны “Корнелья” клубийг худалдан авсан тухай мэдээлж байсан билээ.
Шигшээ багийн карьер ба амжилтууд
8 дугаар сарын 31-нд Месси Аргентины шигшээ багаас зодог тайлж байгаагаа зарласан юм. Тэрээр багаа ахлан 2022 оны ДАШТ-д түрүүлж, 2026 оны дэлхийн аварга шалгаруулах тэмцээний финалд шалгарч байв. Түүнчлэн түүний амжилтад 2008 оны Олимпийн алт, Америкийн цомын хоёр удаагийн аварга (2021, 2024) болон Финалиссима-2022 тэмцээний цом багтдаг.
Месси дээд амжилт болох 8 удаа “Алтан бөмбөг” хүртэж, Олон улсын хөлбөмбөгийн холбооны (ФИФА) оны шилдэг тоглогчоор 3 удаа тодорсноос гадна Европын аварга шалгаруулах тэмцээнүүдийн шилдэг мэргэн буучийн “Алтан шаахай”-г 6 удаа, ДАШТ-ий шилдэг тоглогчийн “Алтан бөмбөг”-ийг 2 удаа хүртэж байжээ.
Месси 2023 оноос хойш “Интер Майами” багт тоглож байгаа бөгөөд 2025 онд тус багтайгаа MLS-ийн аварга болсон. 2025 оны 10 дугаар сард аргентин залуу АНУ-ын клубтэй байгуулсан гэрээгээ 2028 оны эцэс хүртэл сунгасан юм.
