Ромын Хамба Лев XIV хиймэл оюун ухааны хэрэглээнд хязгаарлалт, зохицуулалт хийх шаардлагатай гэж уриалсан байна. Энэ байр суурь түүний шинэ илгээлт болох Magnifica Humanitas-д туссан талаар Vatican News мэдээлжээ.
Шинэ илгээлтэд хиймэл оюуны эрсдэлийг онцолжээ
Vatican News-ийн мэдээлснээр, Ромын Хамба Лев XIV шинэ илгээлтдээ орчин үеийн технологийн хөгжил, тэр дундаа хиймэл оюун ухаан хүн төрөлхтөнд ямар сорилт авчирч болох талаар анхааруулсан байна.
Тэрбээр “Ромын Хамба Лев XIV хиймэл оюун ухааныг хязгаарлахыг уриаллаа. Энэ уриалга түүний шинэ илгээлтэд (Magnifica Humanitas) дурдагдлаа” гэж Vatican News мэдээллээ.
“Шинэ Вавилоны цамхаг” эсвэл хүнлэг хот байгуулах сонголт
Хамба лам хүн төрөлхтөн технологийн дэвшлийн өмнө томоохон сонголттой тулгараад байгааг онцолжээ.
Тэрбээр “Бурхан багшийн бүтээсэн хүн төрөлхтөн өнөөдөр том сорилтын өмнө ирээд байна. Эсвэл шинэ Вавилоны цамхаг барих, эсвэл Бурхан, хүн төрөлхтөн хамтдаа амьдрах хот барих гэсэн сонголт байна” гэж онцолсон байна.
Энэхүү үгээрээ тэрээр хиймэл оюун ухаан, технологийн хөгжил нь хүн төрөлхтнийг нэгтгэж, сайн сайхны төлөө ашиглагдах боломжтой ч эсрэгээрээ хяналтгүй хэрэглэвэл хүний үнэ цэн, ёс суртахуунд заналхийлж болзошгүйг сануулсан гэж үзэж байна.
Алгоритмууд “хүнлэг бус байдлын шинэ хэлбэр” үүсгэж болзошгүй гэв
Ромын Хамба Лев XIV-ийн үзэж байгаагаар, технологийн томоохон компаниудын эзэмшиж буй алгоритмууд нийгэмд шинэ төрлийн эрсдэл бий болгож магадгүй байна.
Түүний байр сууринаас харахад хиймэл оюун ухааныг цөөн компани, хязгаарлагдмал бүлгийн ашиг сонирхолд нийцүүлэн хөгжүүлэх нь “хүнлэг бус байдлын шинэ хэлбэрт” хүргэж болзошгүй аж.
Иймээс тэрээр улс орнуудын засгийн газарт хандан хиймэл оюун ухааны хэрэглээ, хөгжүүлэлтэд тодорхой хязгаарлалт, эрх зүйн зохицуулалт хийхийг уриалжээ.
Ажлын байр алдагдах эрсдэлийг санууллаа
Хамба лам хиймэл оюун ухааны хөгжил олон хүний ажлын байранд шууд нөлөөлж болзошгүйг мөн анхааруулсан байна. Технологийн автоматжуулалт нэмэгдэхийн хэрээр олон салбарт хүний хөдөлмөрийг алгоритм, автомат систем орлох эрсдэл нэмэгдэж байгаа гэж үзжээ.
Энэ нь зөвхөн эдийн засгийн асуудал бус, хүний хөдөлмөрийн үнэ цэн, нийгмийн тогтвортой байдал, амьжиргааны баталгаатай холбоотой өргөн хүрээний сорилт болохыг тэрээр сануулсан байна.
Цэрэг дайны салбар дахь хиймэл оюун ухаан онцгой аюултай гэжээ
Ромын Хамба Лев XIV хиймэл оюун ухааныг цэрэг дайны салбарт ашиглах нь хамгийн ноцтой эрсдлүүдийн нэг гэж үзэж байна. Түүний анхааруулснаар, ийм технологи хүний шууд удирдлагаас гарах магадлалтай бөгөөд энэ нь хүн төрөлхтөнд урьдчилан таамаглахад бэрх аюул учруулж болзошгүй аж.
Иймээс хиймэл оюун ухааныг зөвхөн инновац, үр ашиг, эдийн засгийн ашиг сонирхлын хүрээнд бус, ёс зүй, хүний эрх, аюулгүй байдлын үүднээс хянах шаардлагатайг тэрээр илэрхийлжээ.
