Сургуулиа төгсөөд ажиллах хүсэлтэй оюутнуудад шинэ хураамж яригдаж эхэлжээ
Трампын засаг захиргаа АНУ-д их, дээд сургууль төгссөний дараа тус улсад үлдэж ажиллах хүсэлтэй гадаад оюутнуудаас 100 мянган ам.долларын хураамж авах боломжийг судалж байгаа талаар албаны эх сурвалж мэдээлжээ.
Нэрээ нууцалсан Цагаан ордны албан тушаалтан ийм санаа хэлэлцэгдэж байгааг баталсан ч ойрын хугацаанд хэрэгжүүлэх тодорхой төлөвлөгөө одоогоор байхгүй гэжээ.
OPT хөтөлбөрийг орлох эсвэл цуцлах эрсдэлтэй
Хэрэв энэ төрлийн өндөр хураамж нэвтэрвэл гадаад оюутнуудын дунд өргөн хэрэглэгддэг төгсөлтийн дараах визийн сунгалт буюу Optional Practical Training хөтөлбөр байхгүй болох магадлалтай байна.
OPT нь АНУ-д суралцсан гадаад оюутнуудад төгссөний дараа тодорхой хугацаанд тус улсад үлдэж, мэргэжлийн чиглэлээрээ ажлын туршлага хуримтлуулах боломж олгодог механизм юм.
Албаныхан OPT-ийг хууль бусаар үлдэх зам гэж үзэж байна
Эх сурвалжийн мэдээлснээр, АНУ-ын албаныхан OPT хөтөлбөрийг гадаадын зарим иргэн тус улсад хууль бусаар үлдэх нэг боломж болгож ашигладаг байж болзошгүй гэж үзэн онцгой анхааралдаа авчээ.
Олон Улсын Боловсролын Хүрээлэнгийн тоо баримтаар, өнгөрсөн намар бараг 300 мянган гадаад оюутан OPT сунгалтад хамрагдсан байна. Энэ нь АНУ-д суралцаж буй нийт гадаад оюутнуудын дөрөвний нэг орчимтой тэнцэх үзүүлэлт юм.
Гадаад оюутны тоог хязгаарлах бодлого эрчимжиж байна
Трампын засаг захиргаа сүүлийн үед АНУ-ын их сургуулиудад суралцах гадаад оюутны тоог бууруулах чиглэлд хэд хэдэн алхам хийж байгаа юм.
Энэ сарын эхээр тус улсын дотоод хэргийн яам олон арван жилийн турш хэрэгжиж ирсэн бодлогод өөрчлөлт оруулж, гадаад оюутнууд сургалтын хугацаа нь дуусаагүй тохиолдолд АНУ-д оршин суух эрхтэй байдаг зохицуулалтыг шинэчилсэн байна.
Шинэ журмаар хүндэтгэн үзэх онцгой шалтгаангүй бол гадаад оюутны оршин суух хугацааг дөрвөн жилээр хязгаарлахаар болсон гэж мэдээлжээ.
Өндөр ур чадвартай ажилтны хураамжтай төстэй санал
Цагаан ордон өмнө нь гадаадаас өндөр ур чадвартай мэргэжилтэн авч ажиллуулахын тулд АНУ-ын компаниуд 100 мянган ам.долларын хураамж төлөх зохицуулалт гаргаж байсан.
Гэвч өнгөрсөн сард холбооны шүүх уг шийдвэрийг хууль бус гэж дүгнэсэн байна. Харин Цагаан ордон энэ шийдвэрийг давж заалдахаар төлөвлөж байгаа юм.
Оюутнуудын ирээдүйд том нөлөө үзүүлж болзошгүй
Хэрэв төгсөлтийн дараа ажиллах эрхтэй холбоотой 100 мянган ам.долларын хураамж бодитой хэрэгжвэл АНУ-д суралцахаар төлөвлөж буй гадаад оюутнуудын шийдвэрт хүчтэй нөлөөлөх магадлалтай.
Ялангуяа АНУ-д боловсрол эзэмшээд дараа нь мэргэжлээрээ ажиллаж туршлага хуримтлуулахыг зорьдог олон улсын оюутнуудын хувьд OPT хөтөлбөрийн хувь заяа хамгийн анхаарал татсан асуудал болж байна.
