Сарны цаад талыг тойрсон нислэгийн үеэр хүн төрөлхтний шинэ рекорд тогтоогдов
“Artemis-2” түүхэн нислэгт оролцож буй сансрын нисэгчид хүн төрөлхтний сансар судлалын түүхэнд шинэ хуудсыг нээлээ. Тэд Дэлхийгээс өмнө нь хэзээ ч хүрч байгаагүй хамгийн алс зайд очиж, Сарны цаад талыг ажиглан, шинэ дээд амжилт тогтоосон байна.
Энэ нислэгт НАСА-гийн сансрын нисэгч Рид Уайзмен, Виктор Гловер, Кристина Кох, мөн Канадын сансрын нисэгч Жереми Хансен нар оролцож байгаа юм. Тэд Дэлхийгээс 406 770 километрийн зайд хүрснээр хүнтэй нислэгийн түүхэн дэх хамгийн хол аялсан баг болжээ. Ингэснээр өмнө нь “Apollo 13” хөлгийн багийн тогтоосон 400 171 километрийн амжилтыг шинэчилсэн байна.
Холбоо 40 минут тасарсан ч Orion хөлөг Сарны цаад талаар амжилттай нисэв
“Orion” хөлөг Сарны цаад талд хүрэх мөчид Хьюстон дахь Нислэгийн удирдлагын төвтэй тооцоолсны дагуу 40 минутын турш холбоо тасарсан байна. Энэ нь нислэгийн төлөвлөгөөний дагуу явагдсан хэвийн үе шат байсан бөгөөд хөлөг тэр үед Сарны гадаргуугаас 6550 километрийн өндөрт нисэж байжээ.
Ийм зайнаас сансрын нисэгчид Сарны дэлхийгээс харагддаггүй хэсгийг илүү тод, нарийвчлалтай ажиглаж, гэрэл зураг авах боломжтой болсон байна. Ялангуяа Сарны туйлын бүсүүд эрдэмтдийн онцгой анхаарлыг татаж байгаа юм. Учир нь ирээдүйн буултын байршлуудыг эдгээр бүсэд төлөвлөж байгаа төдийгүй, тэнд мөс байж болзошгүй гэсэн таамаг дэвшүүлээд байна.
Одоогоор сансрын нисэгчид үндсэн даалгавраа амжилттай гүйцэтгэж, эх дэлхий рүүгээ буцах замдаа оржээ. Ийнхүү “Artemis-2” нислэг нь зөвхөн нэг амжилттай аялал биш, харин хүн төрөлхтнийг Сар руу эргэн аваачих дараагийн шатны бэлтгэлийг илүү бодит болгосон түүхэн алхам боллоо.
