Нийслэл Улаанбаатар хотод жил бүр хоёр удаа автомашингүй өдөр зохион байгуулж, иргэдийг явган алхалт, унадаг дугуй болон нийтийн тээврийн хэрэглээг дэмжих спорт, эрүүл мэндийн арга хэмжээнд хамруулдаг уламжлалтай.
Энэ жилийн эхний автомашингүй өдөр тавдугаар сарын 23-нд болсон бол дараагийнхыг есдүгээр сарын 26-ны Бямба гарагт зохион байгуулахаар болсныг Нийслэлийн Засаг Даргын Тамгын Газраас мэдээлжээ.
Тухайн өдөр Улаанбаатар хотод шөнийн марафон зохион байгуулагдах бөгөөд автомашины хөдөлгөөн тодорхой бүсүүдэд хязгаарлагдах юм. Гэхдээ одоогоор яг ямар авто замууд хаагдах, мөн томоохон зах, худалдааны төвүүдийн үйл ажиллагаанд ямар өөрчлөлт орох талаар дэлгэрэнгүй мэдээлэл гараагүй байна.
Автомашингүй өдрийг “Эрсдэлгүй-эрүүл орчныг хамтдаа” уриан дор зохион байгуулах бөгөөд хотын төвийн тодорхой хэсэгт автомашины хэрэглээг багасгаж, иргэдийг нийтийн тээвэр ашиглах, дугуй унах болон явган зорчихыг дэмжихээр төлөвлөжээ.
Мөн энэ өдөр Нийслэлийн Эрүүл Мэндийн Газрын харьяа байгууллагууд болон хувийн хэвшлийн эрүүл мэндийн байгууллагууд иргэдэд эрүүл мэндийн үзлэг, зөвлөгөө, мэдээлэл хүргэдэг уламжлалтай.
Ийнхүү есдүгээр сарын 26-нд болох автомашингүй өдөр нь зөвхөн замын хөдөлгөөнийг хязгаарлах бус, спорт, эрүүл мэнд, идэвхтэй хөдөлгөөнийг нэг дор дэмжсэн нийтийн арга хэмжээ болох юм.
