Узбекистаны Самарканд хотод болсон шатрын 46 дахь олимпиад оролцогч орны тоогоороо түүхэн дээд үзүүлэлт тогтоожээ. Швейцарь системээр 11 өрөг тоглосон тус тэмцээний эрэгтэйчүүдийн ангилалд 205 улсын 206 баг, эмэгтэйчүүдийн ангилалд 188 улсын 189 баг өрсөлдсөн байна.
Монголын эрэгтэй, эмэгтэй шигшээ багууд тэмцээнийг амжилттай өндөрлүүлж, нэгдсэн дүнгээр 16 дугаар байрт жагсжээ.
Эрэгтэй баг 26 дугаар байрт шалгарлаа
Эрэгтэйчүүдийн тэмцээнд Узбекистаны баг түрүүлж, Энэтхэгийн шатарчид мөнгөн медаль, Германы баг хүрэл медаль хүртсэн байна.
Монголын эрэгтэй шигшээ багийн бүрэлдэхүүнд:
- Их мастер С.Билгүүн
- Олон улсын мастер Г.Амартүвшин
- М.Амилал
- Х.Итгэлт
- Ү.Агьбилэг
нар багтжээ.
Манай баг 11 өргөөс долоод нь хожиж, нэг тэнцэж, гурван удаа хожигдсоноор нийт 15 оноо авч, 26 дугаар байрт бичигдсэн байна.
Эмэгтэй шигшээ 7 дугаар байрт орлоо
Эмэгтэйчүүдийн ангилалд БНХАУ-ын баг алтан медаль хүртэж, Казахстан мөнгө, Энэтхэг хүрэл медалийн эзэн болжээ.
Монголын эмэгтэй шигшээ баг:
- Их мастер Б.Мөнгөнтуул
- Т.Мөнхзул
- Олон улсын мастер Б.Мөнгөнзул
- Б.Баярмаа
- Кандидат мастер Х.Баясгалан
нарын бүрэлдэхүүнтэй оролцсон байна.
Манай шатарчид найман хожил, нэг тэнцээ, хоёр хожигдолтой тэмцээнээ дуусгаж, 17 оноо цуглуулан долдугаар байр эзэлжээ.
Гуравдугаар байраас долдугаар байр хүртэлх багууд бүгд 17 оноотой байсан тул нэмэлт үзүүлэлтээр эрэмбэлсэн байна. Монголын эмэгтэй баг мөнгөн медаль хүртсэн Казахстантай тэнцэж, хүрэл медаль авсан Энэтхэгтэй ижил оноотой байсан нь онцлох амжилт болов.
Нэгдсэн дүнгээр Монгол 16 дугаар байрт
Эрэгтэй, эмэгтэй багийн нийлбэр дүнгээр Энэтхэгийн шигшээ тэргүүлсэн бол Монгол Улсын баг 16 дугаар байрт оржээ.
Хувийн амжилтаар кандидат мастер Х.Баясгалан зургаан хожил, дөрвөн тэнцээ, нэг хожигдолтой тоглож, нийт найман оноо цуглуулан өөрийн ширээндээ дөрөвдүгээр байр эзэлсэн байна.
Ийнхүү оролцогч орны тоогоороо түүхэн дээд амжилт тогтоосон шатрын олимпиадад Монголын багууд тогтвортой амжилт үзүүлж, эмэгтэй шигшээ медалийн бүстэй тун ойрхон өрсөлдлөө.
