Биоэнергийн судалгаа, эмчилгээний үндэсний хүрээлэнгийн 25 жилийн ой, “Альтернатив” эмнэлгийн таван жилийн ойд зориулсан хүчит бөхийн барилдаан болж, улс, аймаг, цэрэг, сумын цолтой нийт 128 бөх зодоглолоо.
Барилдааны түрүү бөхөөр Ховд аймгийн Буянт сумын харьяат, “Аврагч” спорт хороо, Зорчигч тээвэр-1 ОНӨААТҮГ, “Ховд” дэвжээний бөх, улсын аварга Оргихын Хангай тодорсон байна.
Харин үзүүрт Архангай аймгийн Батцэнгэл сумын харьяат, “Алдар” спорт хороо, ЗХ-013 дугаар анги, “Хатант Интернэйшнл” ХХК, “Суман Зурхай” ХХК, “Бөхбилэгт” дэвжээний бөх, улсын үнэн зоригт харцага Батсүхийн Зоригтбаатар шалгарчээ.
Их шөвөгт хэн хэн үлдэв?
Их шөвөгт Өвөрхангай аймгийн Төгрөг сумын харьяат, Барилга инженерийн цэргийн удирдах газар, “Их Монголын Хүчтэн” дэвжээний бөх, улсын арслан Ц.Бямба-Отгон шалгарсан байна.
Мөн Сүхбаатар аймгийн Онгон сумын харьяат, “Хилчин” спорт хороо, ХЦ-0208 дугаар анги, “Нэгдэл” клуб, Зорчигч тээвэр-2 ОНӨААТҮГ, “Өрнөх цамхаг” ХХК, “Жавхлант” дэвжээний бөх, аймгийн хурц арслан Н.Өсөхбаяр их шөвөгт үлджээ.
Наймын даваанд улсын үнэн зоригт харцага Н.Золбоо, улсын харцага Э.Мөнхжаргал, улсын начин Б.Лхагвадорж, улсын начин Б.Шаравдорж нар шалгарсан байна.
Дараагийн барилдаан аравдугаар сарын 3-нд болно
Үндэсний бөхийн дараагийн барилдаан аравдугаар сарын 3-ны бямба гарагт 13:00 цагаас үргэлжилнэ.
Энэ удаагийн барилдаан Нутгийн буян группийн 30 жилийн ойд зориулсан намрын нээлтийн барилдаан байх бөгөөд мөн улс, аймаг, цэрэг, сумын цолтой 128 бөх хүч үзэх юм.
Ийнхүү ойн нэрэмжит барилдаанд улсын аварга О.Хангай түрүүлж, Б.Зоригтбаатар үзүүрлэн, хүчтэй өрсөлдөөнтэй барилдааныг өндөрлүүллээ.
