Японы Айчи муж, Нагояа хотод зохион байгуулж буй Азийн зуны спортын XX наадам нээлтээ хийснээс хойш гурав дахь өдрөө үргэлжилж байна.
Тэмцээний хоёр дахь өдөр дугуйн спортын засмал замын эрэгтэйчүүдийн цуваа гараатай уралдаан болж, медальтнууд тодорчээ.
Монгол Улсаас олон улсын хэмжээний мастер С.Жамбалжамц оролцож, 42 минут 58.06 секундийн амжилтаар хүрэл медаль хүртсэн байна.
Монголын 300 гаруй тамирчны медалийн салхийг хагаллаа
Тус төрөлд 18 орны 18 дугуйчин өрсөлдсөн бөгөөд С.Жамбалжамц гуравдугаар байрт орсноор 300 гаруй тамирчны бүрэлдэхүүнтэй Монголын багийн энэ удаагийн Азийн наадмын анхны медалийг авчирлаа.
Тэрээр өмнө нь “Ханжоу-2022” Азийн наадмаас мөн хүрэл медаль хүртэж байсан тул хоёр Азийн наадам дараалан шагналын тавцанд гарч, хошой медальтан болж байна.
С.Жамбалжамц нь Монголын дугуйн үндэсний шигшээ багийн тамирчин бөгөөд Испанийн мэргэжлийн Burgos клубт хүчин зүтгэдэг.
Шар тивийн чансааны хоёрдугаар байрт эрэмбэлэгддэг тэрээр Монголын дугуйчдаас ганцаарчилсан төрөлд Азийн наадмын дөрөв дэх медалийг эх орондоо авчирчээ.
С.Жамбалжамц есдүгээр сарын 23-нд бөөн гараатай уралдаанд дахин оролцоно.
Монголын дугуйн спорт Азийн наадамд өмнө нь ямар амжилт үзүүлж байв
Дугуйн спорт 1951 онд Энэтхэгт болсон Азийн наадмын хөтөлбөрт анх багтсан түүхтэй.
Монголын дугуйчдын Азийн наадмын ганцаарчилсан төрлийн өмнөх медалиудаас дурдвал:
- 1982 оны Делигийн Азийн наадмаас Ц.Ганболд мөнгөн медаль;
- 1990 оны Бээжингийн Азийн наадмаас Д.Төмөр-Очир хүрэл медаль;
- 2023 оны Ханжоугийн Азийн наадмаас С.Жамбалжамц хүрэл медаль хүртэж байв.
Харин “Айчи-Нагояа 2026” наадмаас С.Жамбалжамц дахин хүрэл медаль хүртсэнээр Азийн наадмын хошой медальтан боллоо.
Үүнээс гадна Монголын дугуйчид Азийн наадмын багийн төрөлд мөнгө болон хүрэл медаль хүртэж байсан түүхтэй.
Alexey Lutsenko алтан медаль хүртэв
Эрэгтэйчүүдийн засмал замын цуваа гараатай уралдаанд Казахстаны Alexey Lutsenko 41 минут 24.05 секундийн амжилтаар түрүүлж, алтан медаль хүртжээ.
Дэлхийн аварга, Азийн наадмын хошой аварга тэрээр ийнхүү тус наадмаас гурав дахь алтан медалиа авсан байна.
Харин “Ханжоу-2022” Азийн наадмын аварга, Японы дугуйчин Imamura Shunsuke 42 минут 58.04 секундийн амжилтаар мөнгөн медаль хүртжээ.
С.Жамбалжамц түүнээс ердөө 0.02 секундээр хоцорч, хүрэл медалийн эзэн болсон байна.
