2026 оны есдүгээр сарын 20-ноос 21-нд шилжих шөнө Ботаникийн цэцэрлэгт хүрээлэнгийн ойролцоо баавгай явж байгаа тухай мэдээлэл холбогдох байгууллагад бүртгэгджээ.
Үүнтэй холбоотойгоор Туул гол, Ботаникийн цэцэрлэгт хүрээлэн болон ойр орчмын нутаг дэвсгэрт мэргэжлийн байгууллагууд эрэн хайх ажиллагааг эрчимжүүлэн зохион байгуулж байгаа талаар Богдхан уулын дархан цаазат газрын Хамгаалалтын захиргаанаас мэдээлсэн байна.
Эрэн хайх ажиллагаанд 20 гаруй албан хаагч ажиллаж байна
Баавгайн байршлыг тогтоох, иргэдийн аюулгүй байдлыг хангах зорилгоор 20 гаруй албан хаагч эрэн хайх ажиллагаанд оролцож байгаа аж.
Мөн дрон болон шаардлагатай бусад техник, тоног төхөөрөмжийг ашиглан тухайн бүсийг шалгаж байгаа юм байна.
Холбогдох байгууллагууд ялангуяа Ботаникийн цэцэрлэгт хүрээлэн болон Баянзүрх дүүргийн 12 дугаар хорооны ойролцоо амьдардаг, зорчиж буй иргэдийг анхаарал болгоомжтой байхыг сануулжээ.
Баавгайтай таарвал яах вэ
Иргэдэд дараах зөвлөмжийг хүргүүлж байна:
- Баавгайтай таарсан тохиолдолд ойртолгүй, аль болох тайван байж, аюулгүй зай барин холдох;
- Баавгайг хөөх, үргээх, чанга дуу чимээ гаргах, айлгаж цочоохгүй байх;
- Зураг болон бичлэг хийхийн тулд ойртохгүй байх;
- Хүүхэд болон өндөр настай хүнийг хараа хяналтгүй явуулахгүй байх;
- Ялангуяа ой, уулын бүс, голын эрэг орчимд зорчихдоо сонор сэрэмжтэй байх;
- Баавгайн мөр, ул мөр болон бусад шинж тэмдэг илэрсэн тохиолдолд өөрөө дагаж мөрдөхгүй, тухайн газраас холдон холбогдох байгууллагад мэдэгдэх.
Иргэд өөрсдийн аюулгүй байдлыг нэн тэргүүнд тавьж, эрсдэлтэй үйлдэл хийхгүй байхыг мэргэжлийн байгууллагууд онцлон зөвлөжээ.
Баавгай харвал эдгээр дугаарт мэдээлнэ
Баавгайг харсан, эсвэл түүний мөр, ул мөр байж болзошгүй шинж тэмдэг илэрсэн тохиолдолд иргэд дараах утасны дугааруудад мэдээлэл өгөх боломжтой:
- 102
- 77070840
- 72720303
- 11-310005
Иргэдийн амь нас, эрүүл мэндийн аюулгүй байдлыг хамгаалах зорилгоор мэдээллийг шуурхай хүргүүлэхийг холбогдох байгууллагаас хүссэн байна.
Богдхан уул болон ойролцоох бүсэд зорчихгүй байхыг зөвлөв
Мөн Богдхан уулын дархан цаазат газар болон ойролцоох уул, ойн бүсэд түр хугацаанд зугаалах, алхах, аялал хийхээс татгалзахыг анхааруулжээ.
Ялангуяа баавгай үзэгдсэн гэх мэдээлэлтэй холбоотойгоор Туул голын эрэг, Ботаникийн цэцэрлэгт хүрээлэн болон ойролцоох ногоон бүсэд зорчихдоо өндөр сэрэмжтэй байх шаардлагатай байна.
