Улаанбаатар хотод цахилгаан автомашины хэрэглээг нэмэгдүүлэхтэй зэрэгцэн цэнэглэх дэд бүтцийг өргөжүүлэх ажил үргэлжилж байна. Нийслэлийн хэмжээнд хэд хэдэн байршилд цахилгаан автомашины ногоон өртөө байгуулсан бөгөөд ойрын хугацаанд дахин 4-5 цэнэглэх цэгийг шинээр ашиглалтад оруулахаар бэлтгэж байгаа аж.
НЗДТГ-ын хэвлэлийн хэлтсийн мэдээлснээр, одоогоор 32-ын тойрог, Уран ган, Хан-Уулын Е-март, Говийн үйлдвэр, Шинэ нисэх, Тасганы овоо, Спортын төв ордон, Цэцэрлэгт хүрээлэн, Топ моторс, Sillla center болон Gallery орчимд цахилгаан автомашин цэнэглэх ногоон өртөөнүүд ажиллаж байна.
Дахин 4-5 цэнэглэх цэг нэмнэ
Нийслэлийн зүгээс одоо байгаа цэнэглэх дэд бүтцийг өргөжүүлж, цахилгаан автомашин эзэмшигчдийн хэрэгцээг хангах зорилгоор 4-5 шинэ цэгийг нэмэн ашиглалтад оруулахаар бэлтгэл ажлаа эхлүүлжээ.
Энэ долоо хоногт ашиглалтад орсон Тасганы овооны цэнэглэх станц нь шинэ дэд бүтцийн нэг жишээ болж байна. Тус төсөл 6,650 ам метр талбайд хэрэгжсэн бөгөөд олон улсын ногоон барилгын LEED Gold стандартын шаардлагад нийцсэн ногоон байгууламжийн шийдэлтэй аж.
Нэг автомашиныг 15-45 минутад цэнэглэнэ
Тасганы овоо дахь станц 410 киловаттын суурилагдсан хүчин чадалтай нарны цахилгаан үүсгүүртэй. Мөн 300 киловаттын инвертерийн систем, 430 киловатт-цагийн багтаамжтай батарей хуримтлуурын систем суурилуулжээ.
Станцын нийт суурилагдсан хүчин чадал 720 киловатт бөгөөд дөрвөн цахилгаан автомашин цэнэглэх хошуутай байна.
Автомашины загвар, батарейн багтаамж болон тухайн үеийн цэнэгийн түвшнээс шалтгаалан нэг автомашиныг ойролцоогоор 15-45 минутын хугацаанд цэнэглэх боломжтой аж.
Цахилгаан автомашины тоог 50 мянгад хүргэх зорилт тавьжээ
Улаанбаатар хотын агаарын бохирдлын 33 орчим хувь нь автомашины утаанаас үүсдэг гэсэн тооцоо байна.
Нийслэлд одоогоор 2,700 орчим цахилгаан автомашин бүртгэлтэй байгаа бөгөөд энэ тоог цаашид 50,000-д хүргэх зорилт тавьжээ.
Хэрэв уг зорилт хэрэгжвэл 66,000 тонн нүүрсхүчлийн хий ялгаруулах эрсдэлийг бууруулах боломж бүрдэнэ гэж тооцоолж байна.
Шатахууны импортын зардлыг бууруулах боломжтой
Монгол Улс жил бүр бензин, шатахуун импортлоход ойролцоогоор 2.4 тэрбум ам.доллар зарцуулдаг байна.
Цахилгаан автомашины хэрэглээг нэмэгдүүлж, нийслэлийн цэнэглэх дэд бүтцийг шат дараатай өргөжүүлэх нь зөвхөн агаарын бохирдлыг бууруулахаас гадна импортын түлшний хэрэглээг багасгах боломжтой гэж үзэж байна.
Ийнхүү Улаанбаатар хотод цахилгаан автомашины цэнэглэх шинэ цэгүүдийг нэмэгдүүлж, одоо ажиллаж буй ногоон өртөөнүүдийн сүлжээг цаашид өргөжүүлэхээр төлөвлөжээ.
