АНУ-ын тусгай төлөөлөгч Стив Уиткофф, хүргэн Жаред Кушнер нар Москва болон Киев хотуудад айлчлал хийсний дараа ОХУ-ын Ерөнхийлөгч Владимир Путин АНУ-ын Ерөнхийлөгч Доналд Трамптай утсаар ярьлаа. Талууд тус айлчлалын үр дүнг эергээр үнэлж, Украины мөргөлдөөнийг зохицуулах болон хоёр улсын харилцааг сэргээх асуудлыг хөндөн хэлэлцсэн байна.
Утсан харилцааны үеэр Доналд Трамп мөргөлдөөнийг аль болох богино хугацаанд зогсоох хүсэлтэй байгаагаа илэрхийлээд, ингэснээр хоёр гүрний хоорондын худалдаа, эдийн засгийн хамтын ажиллагааг сэргээх боломж бүрдэнэ гэдгийг онцоллоо.
Үүний хариуд Владимир Путин Цагаан ордны тэргүүний бүтээлч хамтын ажиллагааг сэргээх эрмэлзлийг сайшаан хүлээн авч, дайны өнөөгийн нөхцөл байдлын талаар дэлгэрэнгүй мэдээлэл өгсөн байна. Мөн ОХУ-ын зүгээс Европын орнуудын эсрэг ямар нэгэн түрэмгийлсэн төлөвлөгөө байхгүй гэдгийг албан ёсоор тэмдэглэжээ.
В.Зеленськийн төлөвлөгөө ба Өрнөдийн цэргийн тусламж
Украины Ерөнхийлөгч Володимир Зеленський энэ сарын 20-ны орчимд Доналд Трамптай уулзахаар төлөвлөж буйгаа мэдэгдсэн хэдий ч Цагаан ордны зүгээс энэхүү товлолыг хараахан албан ёсоор баталгаажуулаагүй байна. В.Зеленський уг уулзалтаар болон АНУ-ын төлөөлөгчидтэй хийсэн яриагаараа дараах асуудлуудыг онцолжээ:
- Украины зэвсгийн хэрэгцээ: Ирэх өвөл тус улсын агаарын хамгаалалтад 300 нэгж пуужин нэн шаардлагатай байгааг илэрхийлэв.
- Герман Улсын тусламж: Германы тал Украинд PAC-2 пуужин нийлүүлэхээ мэдэгдэж, Европын бусад орнуудыг уг жишгийг дагахыг урив.
- Их Британи Улсын дэмжлэг: Их Британиас Киевт зориулан 135 сая ам.долларын цэргийн тусламжийн шинэ багц гаргахаар болсноо зарлалаа.
